Техник технологийн эрин зуунд тэргүүлэгч болох хүсэлтэй хүчтэй өрсөлөгчдийн нэг бол Хятадын технологийн компани Huawei. Тус компанийн 5G гар утасны сүлжээг Шинэ Зеландад ашиглахаас татгалзжээ.

Шинэ Зеландын цахилгаан холбооны хамгийн том компани Spark нь 5G сүлжээг Huawei компанийн төхөөрөмжийг ашиглан цацах төлөвлөгөөтэй байсан ч Засгийн газар хориг тавьсан байна. Учир нь хэт өндөр хурдтай сүлжээ цацагдвал үндэсний аюулгүй байдал эрсдэлд орно гэж үзжээ.

Шинэ Зеландын Засгийн газрын харилцаа холбооны аюулгүй байдлыг хамгаалах товчоо дээрх мэдээллийг баталсан. Тус улсын харилцаа холбооны аюулгүй байдлын хууль дүрэмд ч энэ тухай тусгасан болохыг товчооны захирал Эндрю Хэмптон мэдээлсэн байна.

Гар утасны 5G сүлжээг нэвтрүүлээд байгаа дэлхийн цөөхөн брэндүүдийн нэг нь Huawei харилцаа холбоо, ухаалаг гар утас үйлдвэрлэгч компани юм. Одоогоор Шведийн Эриксон, Финляндын Нокиа брэндүүд 5G сүлжээг ашиглаж байна.

Huawei 5G сүлжээг ашиглахаас татгалзсан орон зөвхөн Шинэ Зеланд биш. Австрали, АНУ-ууд ч мөн хориглоод байгаа. АНУ-ын эрх баригчид Канадын Засгийн газарт хандан Huawei компанийн 5G сүлжээний төхөөрөмжийг ашиглахгүй байхыг уриалж, Герман, Япон, Итали улсуудыг уг төхөөрөмжийг ашиглахаа зогсоохыг шаардаж байна.

Хятадын тэргүүлэгч технологийн компани 5G сүлжээг ашиглах 20 орчим гэрээ байгуулсан ч зарим компани, засгийн газрууд гэрээний дагуу үйл ажиллагаагаа бүрэн хэрэгжүүлэх боломжгүй болоод байгаа юм.

 

Эх сурвалж: www.edition.cnn.com

---