"Асралт мед" эмнэлгийн дарга Н.Гансүхтэй ярилцлаа...

Н.Гансүх: ЭМД-ын салбар, систем өөрчлөгдөж хувь, улсын эмнэлэг гэж ялгахгүй бүх эмнэлэг ЭМД-аар үйлчлэх боломжтой болсон. Манай эмнэлэг ЭМД-тай хамтарч бүх төрлөөр ЭМД-аар үйлчилж байна. Төрөлжсөн нарийн мэргэжлийн тусламж үйлчилгээ, лавлагаа үйлчилгээ авах шаардлагатай тохиолдолд 13-р маягтаар бүх тусламж, үйлчилгээг манай эмнэлэг үзүүлж байна.

Мөн яаралтай тусламжийн дуудлага 103-аар ирсэн бүх төрлийн өвчтөнүүдийг манай эмнэлэг яаралтайгаар авч байгаа. Түүнчлэн гэмтэл, мэс засал, мэдрэлийн яаралтай тусламжийг манайх өгч байгаа бөгөөд энэ бүгд тусламж үйлчилгээг даатгалаар үзүүлж байна. Хувийн эмнэлгүүд дундаас хавдар, тархины зэрэг зүрхнээс бусад бүх төрлийн мэс заслыг манайх хийж байгаагаараа анхдагч юм.

-      Танай эмнэлэг даатгалаар үйлчилж байгаа ч үнэхээр тухтай юмаа

Хувийн эмнэлэг ч гэсэн улсын эмнэлэгтэй адилхан даатгалаар үйлчилж болдог. Манай эмнэлэг даатгалаар үйлчилдэг ч дэлхийн стандартад нийцсэн тав тух, үйлчилгээг үзүүлдэг.

12 давхар шинэ байраа нээх үед дэлхий дахинд Ковид-19 гарч эхэлсэн. Тиймээс нийгмийн хариуцлагын хүрээнд манай эмнэлэг барилгынхаа гурван давхрыг тусгаарлалтад үнэ төлбөргүй ашиглуулах шийдвэрийг гаргасан юм. Өөрөөр хэлбэл коронавирусийн тусгаарлалтын анхны эмнэлэг болсон. Хэдийгээр Ковид хүндрэлтэй байгаа ч халуурсан болон өвчтэй хүмүүсийн өмнө эмнэлэг үүд хаалгаа хаах ёсгүй. Тиймээс ч манай эмнэлэгт халдвар илэрсэн тохиолдол бий. Үүний дараа бид манайд хандсан өвчтөн бүрээс түргэвчилсэн оношлогоогоор тест авч, үйлчилгээ үзүүлж байгаа.

Яаралтай хүнд өвчтөн коронавирустэй байсан тохиолдолд бид буцаахгүй. Шаардлагатай тохиолдолд хүний амийг аврахын тулд Ковид-той байсан ч мэс засал хийх ёстой. Ковид-той хүмүүсийг буцаах асуудал байж болохгүй.

Хорт хавдраас болж жилд 4,000 гаруй хүн нас барж, шинээр 6,000 гаруй хүнээс хорт хавдар илэрч байгаа нь сэтгэл эмзэглүүлдэг. Энэ нь эрт илрүүлэг сул байсантай холбоотой. Гэхдээ сүүлийн үед эрт илрүүлдэг болсон. Хамгийн их эмзэглүүлдэг нь элэгний хорт хавдар байдаг. Дэлхийн хамгийн өндөр хөгжилтэй эмнэлгүүдэд элэг шилжүүлэн суулгах мэс засал хийх жишигтэй. Манай улсад үүнийг УНТЭ, ХСҮТ-д хийж байгаа ч хүрэлцээгүй байна. Иргэд элэг шилжүүлэн суулгахын тулд гадаад улс орнуудад өндөр өртөгтэй, түвэг чирэгдэл ихтэйгээр зорьж байгаа. Тиймээс хувийн эмнэлгүүдэд элэг шилжүүлэн суулгах хагалгааг хийж эхлэхээр судалж байсан. Миний гол зорилго гадаад улсад хийж байгаа хагалгаануудыг эх орондоо бусад эмч, эмнэлгийн салбарын мэргэжилтнүүдтэй хамтарч хийх юм. Энэ чиглэлээр тодорхой амжилтад хүрч байгаа.

-      Монгол эмч нар чадвартай ч хагалгааны өрөө тасалгаа, багаж чухал байх...

Манай улсад дэлхийн стандартад нийцсэн хагалгааны вакум өрөө, бусад тоног төхөөрөмж байгаа. Бид дурангийн хагалгааг хүндрэлгүй хийж эхэлсэн. Хамгийн их өвчлөл нь чих хамар хоолой байдаг. Манай эмнэлэг чих хамар хоолойгоор төрөлжсөн эмнэлэг юм. Чих хамар хоолойн төрөлжсөн хамгийн шинэлэг иж бүрэн багаж хэрэгсэл зөвхөн манай эмнэлэгт байгаа.

Үе, түнх, дуран, тэнхлэг засах зэрэг бүх төрлийн хагалгааг манайх хийсээр байна. Эрүүл мэндийн салбарт өвчлөл их тарж байгаа нь эмнэлгээр их явж байгаагаас үүдэлтэй учраас дандаа нэг удаагийн багаж хэрэглэе гэсэн санааг Германы эмч дэвшүүлж байсан. Гэвч манайд үйлдвэр байхгүй учраас тэр бүр нэг удаагийн багаж хэрэглэхэд хүндрэлтэй. Гэтэл нэг удаагийн багажаар хийдэг маш олон төрлийн хагалгаа байгаа. Манайх аюулгүй байдлын үүднээс нэг удаа хэрэглэдэг хагалгааны багаж төхөөрөмжийг стандартын дагуу ашиглаж байна.

---