БНХАУ-аас импортолж оруулж ирсэн 289 кимчи, кимчиний төрлийн бүтээгдэхүүний 15-аас нь хоолны хордлого үүсгэгч нян илэрсэн гэж БНСУ-ын Хүнс, эмийн аюулгүй байдлын яамнаас мэдээлжээ. Мөн Хятадын давсалж, хатаасан байцайн бүтээгдэхүүнүүдийн хоёроос нь Өмнөд Солонгост хэрэглэхийг хориглосон хадгалалтын бодис илэрсэн байна.

Өмнөд Солонгосын албаныхан энэ оны 3 дугаар сарын 12-ноос 5 дугаар сарын 7-ны хооронд эрчимжүүлсэн шалгалт зохион байгуулж, импортын кимчи ба кимчиний төрлийн бүтээгдэхүүнүүдэд үзлэг хийн, шаардлага хангаагүй хэд хэдэн бүтээгдэхүүнийг илрүүлжээ. Хятадын нэгэн кимчиний үйлдвэрийн усан санд нүцгэн эрэгтэй байцай даршилж байгаа бичлэг ил болсны дараа Солонгосын иргэдийн дунд ихээхэн шуугиан үүсэж, орон нутгийн эрх баригчид импортын кимчиний эрүүл ахуйд үзлэг хийсэн аж.

Ингээд мэргэжилтнүүд Хятадын 55 компанийн нийт 289 бүтээгдэхүүнд шалгалт хийсэн бөгөөд 15-аас нь хүнсний хордлого үүсгэгч нянгийн нэг төрөл болох "Yersinia enterocolitica"-г илрүүлжээ. Хүнс, эмийн аюулгүй байдлын яамнаас Хятадын холбогдох компаниуд болон Солонгосын импортлогчдод эдгээр бүтээгдэхүүнийг Хятад руу буцаан, устгалд оруулахыг тушаасан байна.

Мөн тус компаниуд дахин бүтээгдэхүүн импортлох үед нэмэлт дөрвөн удаагийн хяналт шалгалт хийхээр шийдвэрлэж, БНХАУ-ын Засгийн газраас тус улсын кимчи үйлдвэрлэлийн эрүүл ахуйг сайжруулах чиглэлээр шаардлагатай арга хэмжээг авахыг хүссэн байна.

Эх сурвалж: The Korea Times

---