Нийгмийн даатгалын шимтгэлийн нэмэгдлийг 2021 оны нэгдүгээр сарын 1-ний өдрөөс эхлүүлэн зогсоохыг шаардаж,  МҮЭХ-ноос Сүхбаатарын талбайд суулт зарлалаа. МҮЭХ-ны дэд ерөнхийлөгч С.Эрдэнэбаттай ярилцав. 

МҮЭХ-ны дэд ерөнхийлөгч С.Эрдэнэбат:  

-Нийгмийн даатгал, ХАОАТ нийлээд 36 хувь болж нэмэгдэхээр болчихоод байна. Хоёр хувийн нэмэгдлийг маргааш УИХ-аар хэлэлцэх гэж байна. Нэмэгдэж магадгүй болсон учир бид өнөөдөр Сүхбаатарын талбайд суулт зарлаад байна. 

Үр дүнгүй, өвлөгддөггүй даатгалын шимтгэлд 36 хувийг төлөхийг бүгд эсэргүүцэж байгаа. Төрийн зарим үйлчилгээний албан хаагчид 400-500 мянган төгрөгийн цалинг, хоёр хувааж авдаг. Үүнээс 36 хувийг нь хасчихаар гар дээрээ хэдэн төгрөг авах юм бэ? Яаж амьдрах юм бэ? Гэтэл 10-20 сая төгрөгийн цалин авдаг эрхмүүд шимтгэлээс чөлөөлөгдөөд байна шүү дээ.

Энэ оны нэгдүгээр сарын 1-нээс авч эхэлсэн нийгмийн даатгалын шимтгэлийг мөн хугацаанаас хойш зогсоохыг шаардаж байна. "Капитал" банкнаас авч чадахгүй байгаа 240 тэрбум төгрөгөө олж авахыг шаардаж байна. Зөвхөн энэ их мөнгөний хүүгээр төсвийн алдагдлаа нөхөх боломжтой шүү дээ. 

УИХ-ын гишүүд, ард түмний бодит амьдралтай танилц. Маргааш хуралдаа ирээгүй гишүүдийг бид эсрэг санал өгсөнд тооцож, нэрсийг нь зарлана гэв. 

---