Монгол түмний бахархал болсон Үндэсний бөхийн тамирчид сүүлийн жилүүдэд допинг буюу сэргээшийн төрлийн бодис хэрэглэж,  энэ нь допингийн шинжилгээгээр ил болсон тохиодлууд хэд хэд гарсан. Гэвч энэ нь нийт бөхчүүд бүгд сэргээш хэрэглэж,  хүч тамираа сэргээдэг гэсэн үг биш. Цөөн бөхийн хариуцлагагүй үйлдлээс шалтгаалан нийт бөхчүүдийн нэр хүнд унаж байна гэж залуу бөхчүүд харамсаж байна. 

Тиймээс үндэсний бөхийн залуу харцагууд санаа нэгдэж "бүх бөхчүүд допинг хэрэглэдэггүй" гэдгийг бөх сонирхогч түмэндээ таниулахын тулд монгол бөхийн түүхэнд анх удаа сайн дураараа допингийн шинжилгээнд хамрагдаж байна. 

Завхан аймгийн харъяат, Монгол улсын харцага Т.Бэгзсүрэн, Д.Бат-Эрдэнэ нарын санаачилгаар  Ц.Одбаяр, О.Хангай, Д. Анар, Т.Баасанхүү, Х.Гантулга гэсэн залуу харцагууд допингийн шинжилгээнд сайн дураараа хамрагдаж, бусад бөхчүүддээ үлгэрлэн, допинггүй бөхийн төлөө уриалга дэвшүүлээд байна.

Улсын залуу харцагууд сайн дураараа допингийн шинжилгээнд хамрагдаж, шинжилгээний дээжийг нь БНСУ-руу илгээн шинжлүүлэхэд нийт 12 сая төгрөгийн зардал гарч байгаа ажээ. Уг зардлыг Үндэсний бөхийн холбоо, Биеийн тамир спортын газраас гаргуулах хүсэлт гаргасан боловч Үндэсний их баяр наадмаар шөвгийн 16-д үлдсэн бөхчүүдээс л допингийн шинжилгээ авах  төсөв суугдсан байдаг учир уг мөнгийг шийдэх боломжгүй гэсэн хариу өгчээ. Тиймээс “Хаан даатгал” компани эдгээр бөхчүүдийн допингийн шинжилгээний зардлыг гаргаж, дэмжлэг үзүүлсэн байна. 

---