Дэлхийн эрүүл мэндийн байгууллагын мэдээлснээр хэт олон цагаар ажилласнаас болж жил бүр хэдэн зуун мянган иргэн нас барж байна. Судалгаагаар 2016 онд хэт удаан цагаар ажилласан 745,000 иргэн зүрх судасны өвчлөл, цус харвалтаар нас баржээ.  Уг судалгааг Зүүн Өмнөд Ази болон Номхон далайн баруун эргийн бүс нутгийн улс орнуудад хийсэн байна.

ДЭМБ энэ хандлага коронавируст цар тахлын үед улам хүндэрч болзошгүй гэдгийг анхааруулжээ. Долоо хоногт 55 болон түүнээс илүү цаг ажиллавал цус харвах магадлал 35 хувь, зүрх судасны өвчлөлөөр нас барах эрсдэл 17 хувиар нэмэгддэг байна.

Олон улсын хөдөлмөрийн байгууллага хэт олон цаг ажилласнаас болж нас барсан хүмүүсийн дийлэнх буюу ¾ нь дундаж болон дунджаас ахимаг насны эрчүүд байгааг анхааруулжээ. Тэдгээр хэт ачаалалтай олон цагаар ажилласан хүмүүсийн зарим нь тухайн үедээ биш ч хэдэн арван жилийн дараа хор уршгийг нь хүртэж амь насаа алдсан гэж үзэж байна.

ДЭМБ-ын ажилтан Франк Пегагийн хэлснээр цар тахлын үед хөл хорио тогтоосон улс орнуудад ажлын цаг 10 хувиар уртассан байна. Тус байгууллагын зүгээс ажилчдынхаа эрүүл мэндийн эрсдэлд анхаарал тавихыг ажил олгогчдоос уриалж, энэ нь бүтээмжийг сайжруулахад ч үр нөлөөтэй хэмээн зөвлөжээ.

Эх сурвалж: ВВС

---