Энэтхэгийн далай дахь Африкийн Сейшелийн арлууд хүн амынхаа 61,4 хувийг хоёр удаагийн вакцинжуулалтад хамруулж, бүрэн дархлаажуулжээ. Олон улсын эрдэмтэд хүн амын 60-аас дээш хувийг бүрэн дархлаажуулахад сүргийн дархлаа тогтож, цар тахлын халдвар дарагдана хэмээн мэдээлсэн. Гэвч Сейшелийн арлуудад Ковид-19-ийн тархалт намжаагүй хэвээр байна.

Зуун мянга орчим хүн амтай арлын улсад цар тахлын халдвар нэмэгдсээр хөл хорио тогтооход хүрсэн байна. Өнгөрсөн долоо хоногт мэдэгдсэнээр Ковид-19-ийн 2700 гаруй идэвхтэй тохиолдол байгаа ажээ. Тэдгээр идэвхтэй тохиолдлуудын 33 хувь нь бүрэн вакжинцуулалтад хамрагдсан ч халдвар авсан гэж тус арлын Эрүүл мэндийн яам мэдээлсэн байна.

Хамгийн чухал нь хэдийгээр вакцинжуулалт өндөр хувьтай явагдаж байгаа ч цар тахлын тархалт үргэлжилсээр байгааг тус улсын жишээ харуулж байна. Тиймээс вакцинжуулалттай зэрэгцэн халдвар хамгааллын дэглэмээ сулруулж болохгүй гэдгийг мэргэжилтнүүд сануулж байна. Өнөөдрийн байдлаар Сейшелийн арлуудад нийт 9,100 гаруй хүн коронавирусээр өвчилж, 32 хүн нас баржээ.

Аялал жуулчлалын салбар ДНБ-ы 80 орчим хувийг бүрдүүлдэг тул тус арал хилээ нээж, гадны жуулчдыг коронавирусийн шинжилгээний сөрөг хариутай тохиолдолд тусгаарлалгүй нэвтрүүлж байгаа юм.

Сейшелийн арлууд Хятадын Синофарм болон  Энэтхэгт үйлдвэрлэсэн АстраЗенекагийн Ковишелд вакцинуудыг дархлаажуулалтад хэрэглэсэн. Тодруулбал вакцинжуулалтад хамрагдсан 18-60 насны иргэдийн 57 хувь нь Синофарм, үлдсэн 43 хувь нь Ковишелд тариулжээ.

Эх сурвалж: CNN

---