Польш улсад цар тахлын үеийн хязгаарлалтыг үе шаттайгаар сулруулж эхэлжээ. Сүүлийн долоон сарын хугацаанд хаалттай байсан баар, ресторан, пабууд эргэн нээгдсэн бөгөөд хүмүүс гадуур явахдаа амны хаалт зүүх шаардлагагүй болжээ.

Тус улсын иргэд өнгөрөгч бямба гарагаас эхлэн хоолны газар болон пабуудын гадна талбайд сууж үйлчлүүлэх боломжтой болсон байна. Ингэхдээ тэд хүн хоорондын зай барьж, нүүрээ халхлах шаардлагагүй болжээ. Харин нийтийн тээвэр болон хүнс, барааны дэлгүүрээр үйлчлүүлэхдээ амны хаалт зүүх хэрэгтэй аж.

Өмнө нь тус улсын хоолны газрууд зөвхөн авч явах болон хүргэлтийн хэлбэрээр ажиллаж байсан ба хорио цээрийн дэглэмийг зөөлрүүлэн, зарим хязгаарлалтыг цуцалснаар олон нийтийн газрууд буцаад хөлд дарагдаж эхэлсэн байна. Энэхүү арга хэмжээний дараагийн шатны хүрээнд энэ сарын 29-нөөс эхлэн ресторан, хоолны газруудын дотор сууж хооллох боломжтой болох аж.

Европын Холбоо даяарх коронавирусийн эсрэг вакцинжуулалт хурдаа авч эхэлснээр Польш улсад мөн дархлаажуулалтын хөтөлбөр амжилт олж эхэлжээ. Түүнчлэн сүүлийн долоо хоногт тус улсад халдварын тохиолдол болон эмнэлэгт хэвтэх хүмүүсийн тоо эрс буурсан байна.

Эх сурвалж: Associated Press

---