Энэтхэгийн зүүн хойд хэсгийн Ассам мужийн Нагаон хотод 18 зэрлэг сүргийн заан аянгад цохиулан үхжээ.

Мужийн албан тушаалтнуудын мэдээлснээр Кандолийн дархан цаазат газрын ойн санд аянга буух үеэр заанууд үхсэн байна. Ойн ойролцоох тосгоны оршин суугчид заануудын сэг зэмийг олсныхоо дараа эрх баригчдад мэдэгдсэн аж.

Ассам мужийн Захирагч Химанта Бисва Сарма ийм олон тооны заан үхсэн явдалд ихээхэн санаа зовж байгаа бөгөөд мөрдөн байцаалтын ажиллагаа явуулахыг тушаасан гэж албаныхан тэмдэглэсэн байна. Энэтхэгт 27 мянга гаруй Азийн заан байдаг бөгөөд тэдгээрийн 21 орчим хувь нь Ассамд байдаг юм. Энэ удаагийн явдал нь Ассам мужид сүүлийн 20 жилийн хугацаанд олон тооны заан нэгэн зэрэг үхсэн анхны тохиолдол аж.

Мужийн Ойн сайд Паримал Суклабайдяа өөрийн Твиттер хуудаснаа "Нагаон дахь Кататиолийн нуруунд их хэмжээний аянга цахилгаантай бороо орсны улмаас олон зааны амь эрсэдсэнд маш ихээр шаналж байна" хэмээн бичжээ. Тэрээр мөн Зэрлэг ан амьтдын албаныхан баасан гарагийн өглөө газар дээр нь очиж, үзлэг хийнэ гэдгийг нэмж хэлсэн байна.

Эх сурвалж: BBC

---