Өмнөд Солонгосын Чежү арлын загас агнуурын хоёр холбоо Японы Засгийн газрыг орон нутгийн шүүхэд өгчээ. Тэд Фукушимагийн цөмийн цахилгаан станцын цацраг идэвхт бодистой усыг далайд цутгахаар болсныг эсэргүүцэн, нөхөн төлбөр шаардаж байгаа аж.

Холбооны төлөөлөгчид Японы Засгийн газар болон Токиогийн цахилгаан эрчим хүчний компаниас өдрийн 10 сая воны нөхөн төлбөр шаардаж байгаагаа хэвлэлийн бага хурлын үеэр мэдэгджээ. Цацраг идэвхт бодистой усыг далайд асгасны дараа тэдний борлуулалт 50 хувиар буурна гэж тооцоолсон загасчид энэхүү нөхөн төлбөрийн хэмжээг хүсэж байгаа аж.

Чежүгийн шүүхийн гадна мэдэгдэл хийсэн нэгэн төлөөлөгч "Хорт бодистой усыг зохицуулах өөр аюулгүй аргууд байгаа хэдий ч далайд цутгана гэж зүтгэсээр байгаа нь Япон болон хөрш орнуудын загасчид болон иргэдийн эсрэг хууль бус үйлдэл. Энэ бол хүн төрөлхтний эсрэг асар том гэмт хэрэг" хэмээн тэмдэглэжээ.

Японы Засгийн газар нь бүрэн эрхт улсынхаа үүднээс шүүхэд хамгаалагдаж магадгүй гэдгийг загасчид хүлээн зөвшөөрсөн хэдий ч тэд тус улсын үйлдлийг онц ноцтой гэмт хэрэг гэж тооцон, энэхүү хамгаалалт үйлчлэхгүй гэж найдаж байгаа юм.

Эх сурвалж: Yonhap News Agency

---