ОХУ-ын Татарстан улсын Казань хотын дунд сургуульд болсон халдлагын дараа Ерөнхийлөгч Владимир Путин тус улсын галт зэвсгийн хяналтын дүрэм журмыг чангатгахыг тушаажээ.

Сэжигтэн болох 19 настай Ильназ Галявиевыг саатуулан, хүн амины хэргээр яллах гэж байгаа билээ. Халдлагын улмаас долоон сурагч, хоёр багш амиа алдсан. Мөн хэдэн арван хүн шархадсан бөгөөд тэдний заримын биеийн байдал нь хүнд байгаа юм.

Орон нутгийн цэргийн цагдаагийн мэдээлснээр халдагчийн ашигласан зэвсэг нь хагас автомат буу байсан бөгөөд энэ нь анчдын дунд түгээмэл хэрэглэгддэг аж. Галявиевт энэхүү бууг эзэмших зөвшөөрөл байсан гэж албаныхан тэмдэглэжээ. Тус буу нь ОХУ-д харьцангуй хямд үнээр зарагддаг бөгөөд ойролцоогоор 20 мянган рубль буюу 280 ам.долларын үнэтэй аж.

2020 оны 1 дүгээр сард гарсан мэдээллээр тус улсад дөрвөн сая орчим иргэн 6.6 сая галт зэвсгийг хууль ёсоор эзэмшиж байгаа гэсэн үзүүлэлт гарчээ. Гэхдээ буу эзэмшигчид болон борлуулалтын талаарх мэдээллийг илүү сайн цуглуулах шаардлагатай гэж Оросын улстөрчид үзэж байна. Мөн галт зэвсгийн тусгай зөвшөөрөл эзэмших доод насыг өсгөхийг уриалж байгаа юм. Одоогоор 18-аас дээш насны иргэдэд галт зэвсгийн зөвшөөрөл олгож байгаа аж.

Түүнчлэн ОХУ-д галт зэвсгийн томоохон хар зах байдаг бөгөөд хүмүүс ихэвчлэн цахим платформоос криптовалютаар худалдаж авдаг байна.

Эх сурвалж: BBC

---