БНХАУ-ын Фунин мужид арвилан хэмнэх үүднээс төрсөн өдрийн баярын үдэшлэг, бусад зугаа цэнгэлийн баяр наадмыг хориглох шийдвэр гаргажээ. Мөн хурим, оршуулга зэрэгт 200 юаниас дээш бэлэн мөнгө өгөхгүй байх шинэ дүрэм баталсан байна.

Фунин хотод баталсан уг дүрэм зөвхөн коммунист намын гишүүд, төрийн алба хаагчид, тосгоны захиргааны удирдагчдад хүчин төгөлдөр бөгөөд энгийн ард иргэдэд хамааралгүй ажээ.

Хятадад баяр наадам, үдэшлэгийн зочид бэлэн мөнгө өгөх нь уламжлалт ёс юм. Гэвч зарим тохиолдолд уг уламжлалыг дагаж нөлөө бүхий хүмүүст их хэмжээний авлига хээл хахууль өгдөг байна. Тиймээс 2015 онд Коммунист нам авлигыг бууруулахын тулд хэт тансаглаж найрлах, гольфийн клубуудад нэгдэх, хувийн клубуудээр үйлчлүүлэхийг хориглож байжээ.

Түүнчлэн Юньан мужид төрийн алба хаагчдыг хуримын зардал болон зочдын жагсаалтаа орон нутгийн захиргаанд дэлгэрэнгүй мэдээлэх дүрэм үйлчлэх гэж байна. Хэрэв зоогийн газарт хуримын дайллага хийх бол зочин бүр 50 юаниас дээш бэлэг өгөхгүй, гэртээ хийх бол ширээ бүр 300 юаниас хэтрэлгүй бэлэг өгөх ёстой ажээ.

Эх сурвалж: ВВС

---