ДЭМБ-аас байгуулсан хараат бус хяналтын зөвлөлийн тайланд коронавирусийн цар тахлаас урьдчилан сэргийлэх боломжтой байсан гэж дүгнэжээ. 

"Ковид-19: Сүүлчийн цар тахал" хэмээн нэрлэсэн энэхүү тайланг Цар тахлын бэлэн байдал ба хариу арга хэмжээний бие даасан зөвлөлөөс эмхэтгэсэн байна. Энэхүү судалгааны ажил нь дэлхий даяар 159 сая гаруй хүнийг өвчлүүлэн, 3.3 сая гаруй хүний амин хүрсэн цар тахлын талаар хариулт олох зорилготой байжээ.

Тэгвэл тус тайланд ДЭМБ болон дэлхийн Засгийн газруудын хамтарсан хариу арга хэмжээ нь "Хорт коктейль" байсан хэмээн мэдэгдсэн байна. ДЭМБ-ын Онцгой комиссоос зарласан олон улсын онц байдлыг долоо хоногийн өмнө тогтоох ёстой байсан гэж шинжээчид үзжээ.

Тус байгууллага нь өнгөрсөн оны 1 дүгээр сарын 22-нд хийсэн анхны хуралдаан дээрээ онц байдал зарлах ёстой байсан ч 1 дүгээр сарын 30-н хүртэл хүлээсэн байна.

Түүнчлэн уг мэдэгдлээс хойших нэг сарын хугацаа нь улс орнуудын хайхрамжгүй байдлын улмаас "алдагдсан" аж. Засгийн газрууд халдварын тархалтыг зогсоох зохих арга хэмжээг авч чадаагүй юм. Мөн ДЭМБ-ын зүгээс олон улсын аяллын хязгаарлалтыг хамгийн сүүлчийн арга хэмжээ гэж буруу тодорхойлсны улмаас улс орнуудад зөв зөвлөмж хүргэж чадаагүй байна. Үүний улмаас Европ болон АНУ 2 дугаар сарыг тэр чигээр нь үрэн таран хийсэн бөгөөд эмнэлгүүд нь дүүрч эхлэхэд л аяллын хязгаарлалт тогтоожээ.

Цар тахлын бэлэн байдал ба хариу арга хэмжээний хараат бус зөвлөлийн дарга бөгөөд Либерийн Ерөнхийлөгч асан Эллен Жонсон Сирлиф "Бид бүхэн өнөөдрийн нөхцөл байдлаасаа урьдчилан сэргийлэх боломжтой байсан. Гэвч бид тоо томшгүй олон алдаа, үл ойлголцол, бэлэн бус байдал болон хариу арга хэмжээний саатлаас үүдэн ийм нөхцөл байдалтай тулгараад байна" хэмээн тэмдэглэжээ.

Эх сурвалж: BBC

---