Улсын хэмжээнд 1500 гаруй Сууц өмчлөгчдийн холбоо /СӨХ/ үйл ажиллагаа явуулдаг. Үүний 926 нь  Улаанбаатар хотод бий. Харин СӨХ-ны үйл ажиллагааг, эрх үүргийг нь хамгаалах СӨХ-ны дээд зөвлөл байдаг ба тус зөвлөлд 900 СӨХ нэгджээ.

СӨХ-ны сарын төлбөрийн тухайд хөдөө орон нутагт дунджаар 3000-15 мянган төгрөг, Улаанбаатар хотод 15-30 мянган төгрөг байдаг бол 10 хүрэхгүй хувь нь 200,000 төгрөгөөс дээш төлбөр авдаг. Эдгээр СӨХ-уудад нийт 24000 орчим ажилтан, албан хаагчид ажилладаг.

Харин иргэдийн дунд СӨХ-ны үйл ажиллагаа, үйлчилгээг төдийлөн сайн мэддэггүй бөгөөд төлбөрийг нь огт төлдөггүй айлууд ч байдаг. Тиймээс ШӨХТГ -т иргэд СӨХ-ны асуудлаар ихээхэн гомдол ирүүлдэг аж.

Иймд аль аль талдаа ойлгомжтой байх үүднээс айл өрхийн төлж буй төлбөр хаана, юунд зарцуулагддаг, иргэн СӨХ-д ямар үнэлгээ өгөх, ямар шаардлага тавьж болох талаар хоёр талын эрх, үүргийг тодорхой болгох хэрэгтэй гэж ШӨХТГ-аас үзэж байна.

Эдгээр асуудлыг шийдвэрлэж, СӨХ-ны үйл ажиллагааг "шилэн" болгож нэгдсэн апп-тай болж байгааг зарлалаа. Эхний ээлжид СӨХ-ны дээд зөвлөлийн гишүүн болох 900 СӨХ хамрагдаж үйл ажиллагаагаа ил тод, нээлттэй болгоод байгаа ажээ.

---