Австралийн цагаачдыг саатуулах газрын доогуур ухсан 20 метр урт хонгил олджээ. Уг хонгилоор дамжин цагаач иргэд оргохыг санаахрсан байна.

Перт хотын ойролцоо Ёнга толгод дахь хонгилыг олоход нэг гарц нь цагаачдыг саатуулах төвийн хашаанаас таван метр зайтай байжээ. Уг газарт орогнол хүсэгчид болон гэмт хэрэгт холбогдож хөөгдсөн 300 гаруй хүн байрладаг байна. Хашааны гадна талаас олдсон хонгилын нөгөө үзүүр хашаан доторх өрөө рүү хөтөлсөн байна. Ойролцоогоор гурван метрийн гүнд ухсан байжээ.

Уг хонгилыг олсны дараа саатуулах төвд байгаа цагаачдыг өөр хэсэгт шилжүүлжээ. Одоогоор уг хонгилоор дамжин цагаач иргэн оргосон гэж үзэхгүй байгаа бөгөөд оргох бэлтгэлээ хангаж байсан гэж таамаглаж байна.

Мөн Австралийн цагаачдын алба болон хилийн аюулгүй байдлыг хамгаалах хүчин хонгилын талаар мэдээлэл хийгээгүй байна. Чухам хэдэн хүн нийлж уг хонгилыг ухсан нь ч тодорхойгүй байгаа ажээ.

Уг төвд саатуулагдсан хүмүүс дунджаар 600 хоног буюу хоёр жил орчим хоригддог ч зарим нь таван жилийн турш саатуулагдах ялтай байна. 2013 онд Ёнга Хиллийн саатуулах төвөөс Вьетнам улсын таван иргэн оргож байжээ.

Эх сурвалж: ВВС

---