Австралийн Порт Линкольн хотын гудамжны хогийн саванд унтаж байсан 13 настай хүү золгүй тохиолдлоор амиа алджээ. Түүнийг дотор нь байсныг мэдээгүй ажилтнууд хогийн сав доторх хогийг хогны машинд шилжүүлэн хийсэн бөгөөд хүү механизм дотор дарагдан, нас барсан байна.

Хогны машины жолооч хогийн савыг ачааны машины ар тал руу хийсний дараа л дотор нь хүн байсныг олж мэдсэн аж. Амиа алдсан хүүгээс гадна 11, 12 настай өөр хоёр хүүхэд мөн гудамжны хогийн саванд унтаж байсан бөгөөд нэг нь хогийн савнаас гарч амжсан бол нөгөөдөх нь хөнгөн гэмтэл аван, амьд үлджээ.

Эдгээр бага насны хүүхдүүд яагаад хогийн саванд унтаж байсан талаар мөрдөн байцаалт явуулж байгаа гэж орон нутгийн цагдаагийн газраас мэдээлсэн байна.

Өмнөд Австралийн өсвөр үеийнхнийг дэмжих төвийн Гүйцэтгэх захирал Жо Кларк "Порт Линкольн Таймс" сонинд өгсөн ярилцлагадаа эдгээр гурван хөвгүүн тус төвөөр ойр ойрхон зочилдог байсан бөгөөд ажилтнууд нь сайн таньдаг байсан гэдгийг хэлжээ. Тэрээр "Харамсалтайгаар амиа алдсан хүү орон гэргүй хүүхэд байгаагүй. Тэр олон өсвөр үеийнхний адил зүг чиг, нийгмийн байр сууриа олоход хүндрэлтэй тулгарч байсан. Янз бүрийн шалтгааны улмаас л гэрээсээ гадуур хонож байсан байх" хэмээн ярьсан байна.

Эх сурвалж: BBC

---