Энэтхэгийн хойд нутагт Ганга мөрний эрэгт нас барсан иргэдийн цогцос олон арваараа гарч ирсэн тухай эх сурвалжууд мэдээлж байна. Тэдгээр цогцоснууд чухам хаанаас ирсэн нь тодорхойгүй ч хагас түлэгдэж, шатсан байгаагаас коронавирусээр нас барсан иргэдийнх байж магадгүй хэмээн таамаглажээ.

Бихар болон Уттар Прадеш мужуудын хилийн ойролцоогоос учир битүүлгээр нас барсан 40 гаруй иргэний цогцос олдсоныг ВВС агентлаг мэдээлэв. Харин зарим эх сурвалжууд 100 орчим цогцос олдсон гэжээ. Орон нутгийн албаны хүмүүс тэдгээр цогцоснуудыг Уттар Прадеш мужаас ирсэн байж болзошгүй гэжээ.

Цогцоснууд голын усанд удаан хөвснөөс хөөсөн байгаа бол зарим нь хэсэгчлэн түлэгджээ. Энэ нь коронавирусээр нас барсан иргэдийн цогцсыг Ганга мөрний дагуу шатааж, хангалттай мод байхгүйгээс голын усанд урсгаж байгааг харуулж байна гэжээ.

Энэтхэгт оршуулгын газрууд дүүрснээс цар тахлаар нас барсан иргэдийг шатааж байгаа ч чандарлах мод, зардалгүй ядуу буурай иргэд гэр бүлийн гишүүд, дотны хүмүүсийнхээ цогцсыг голд урсгаж байна. Уттар Прадеш нь хамгийн их хүн амтай муж бөгөөд коронавирусийн хоёр дахь давлагаа хэдэн долоо хоногийн турш үргэлжилж байна.

Энэтхэгт коронавирусийн халдварын 22 сая гаруй тохиолдол бүртгэгдэж, 250,000 орчим хүн нас бараад байна.

Эх сурвалж: ВВС

---