Токиогийн Олимпын наадмыг зохион байгуулахад ердөө хоёр сарын хугацаа үлдлээ. Зохион байгуулагчид тамирчдад тавих шаардлага болон халдвар хамгааллын дэглэмийн талаар урьдчилсан дүрэм журмаа танилцуулсан. Олимпийн наадамд оролцогчид өдөр бүр коронавирусийн шинжилгээ өгөх ба тэмцээн уралдаанд оролцох, идэх, унтахаас бусад үед амны хаалтаа тайлахгүй байх дүрмийг урьдчилсан байдлаар гаргасан.

Тэгвэл бэлтгэл ажилтай давхцан иргэдийн дунд явуулсан санал асуулгаар Японы иргэдийн 60 хувь нь Токиогийн Олимпын наадмыг цуцлах нь зүйтэй гэж үзжээ. Энэ хооронд нийслэл Токио болон халдварын тархалт нэмэгдсэн зарим мужид зарласан онц байдлын хугацааг тавдугаар сар дуустал сунгаад байгаа юм.

Токиогийн Олимп өнгөрсөн зун болох ёстой байсан ч нэг жилийн хугацаатай хойшлуулж, энэ жилийн долдугаар сарын 23-ны өдөр нээлтээ хийхээр төлөвлөсөн.

Ёмиури Шимбун сонины тавдугаар сарын 7-9-ний өдөр явуулсан судалгаанд хамрагдсан иргэдийн 60 хувь нь Олимпыг цуцлах хүсэлтэй байгаа бол 40 хувь нь наадмыг зохион байгуулахыг дэмжжээ. Мөн наадам зохион байгуулахыг дэмжсэн иргэдийн 23 хувь нь үзэгчгүй явуулах саналтай байна.

Токиогийн Олимпыг зохион байгуулагчид гадны жуулчдыг үзэгчээр оруулахыг хориглосон бол дотоодын иргэдийг үзэгчдийн суудалд суулгах эсэхийг зургадугаар сард эцэслэн шийднэ.

Ёмиури Шимбунаас гадна TBS news агентлагийн өнгөрсөн амралтын өдөр явуулсан судалгаагаар иргэдийн 65 хувь нь Олимпыг зохион байгуулахыг эсэргүүцсэн болон хойшлуулах санал өгсөн бол өнгөрсөн дөрөвдүгээр сард Kyodo news агентлагийн санал асуулгад хамрагдсан иргэдийн 70 хувь нь мөн эсэргүүцсэн байр сууриа илэрхийлжээ.

Эх сурвалж: The Guardian

---