Испани улсын цар тахлын үеийн хөл хорио өнгөрөгч ням гарагийн өглөө дуусгавар болж, хэд хэдэн хотын гудамжинд томоохон үдэшлэгүүд болсон байна.

Өнгөрсөн жилээс эхлэн хэрэгжиж байсан 23:00 цагийн хөл хорио тус улсын 17 бүсийн 13-т нь цуцлагджээ. Испанийн зургаан сарын хугацаатай онц байдлын төгсгөлийг тэмдэглэсэн иргэд Барселоны далайн эрэг болон Мадридын гудамжинд хэдэн зуугаараа цугларан, "Эрх чөлөө" хэмээн хашхирч, бүжиглэж байсан аж.

Эрх баригчид хэдий хөл хорионы дэглэмийг цуцалсан ч олон нийтийн газар зургаагаас дээш хүн цугларахыг хориглосон байна. Гэвч иргэд энэхүү журмыг зөрчөөд зогсохгүй ихэнх нь амны хаалтгүй байжээ. Нийслэл Мадрид хотын "Пуэрта дель Соль" төв талбай дээр цугларсан иргэдийг цагдаа нар тараан, албадан гэрт нь хариулах шаардлагатай болсон байна. Тус хотын дарга Хосе Луис Мартинес-Алмейда "Эрх чөлөө гэдэг бол дүрмийг зөрчих явдал биш" хэмээн анхааруулжээ.

Коронавирусийн цар тахлын эхэн үед тус улсын эрх баригчид гэртээ байх чанга хатуу дүрэм журмыг тогтоосон бол Испанийн хоёр дахь онц байдал өнгөрсөн аравдугаар сараас хэрэгжиж эхэлсэн билээ. Үүний дагуу хорио цээрийн арга хэмжээг сулруулсан хэдий ч орон даяар шөнийн цагаар хөл хорио тогтоож, олон нийтийн цугларалт болон дотоодын аяллыг хязгаарласан юм.

Европын хамгийн их хохирол амссан улсуудын нэг болох Испанид нийт 3.6 сая халдварын тохиолдол бүртгэгдэн, 78,792 хүн цар тахлын улмаас нас барсан билээ. Одоогийн байдлаар тус улсын хүн амын 12.6 хувь нь коронавирусийн эсрэг вакцинжуулалтад бүрэн хамрагдаад байгаа юм.

Эх сурвалж: BBC, Reuters

---