АН-аас Ерөнхийлөгчийн сонгуульд нэр дэвшигч Н.Алтанхуягийг СЕХ бүртгээгээгүйгээс УИХ дахь АН-ын бүлгийн гишүүд Сүхбаатарын талбайд нойтон өлсгөлөн зарлаад байгаа. Тэд СЕХ-нд шаардлагаа дахин хүргүүлжээ. 

УИХ дахь АН-ын бүлгийн дарга Б.Ганбат: 

-Бид хэн нэгний төлөө бус, сонгох, сонгогдох эрх, нэг намын дарангуйллын төлөө өлсгөлөн зарлаад байгаа. АН-ын нэр дэвшигчийг хууль ёсны дагуу бүртгүүлэх шаардлагыг гардуулж, уулзлаа. Яг одоо Захиргааны хэргийн давж заалдах шатны шүүх хуралдаж байгаа юм байна. Зарим баримтуудыг авахаар хэд хэдэн газар хандаад байгаа юм байна. Ямар ч байсан хяналтын ажил явагдаж байна. 

УИХ-ын гишүүн Ц.Туваан: 

-Хоёр Ардчилсан нам байна гэж байснаа нэг намд нь сонгуульд өрсөлдөх эрх олгосныг бид эсэргүүцэж, суултаа өлсгөлөн болгож хувиргаад байна. СЕХ хоёр албан бичгийг /үзэх/ үндэслэн шийдвэр гаргасан байна лээ. Бид үүнийг хууль бус гэж үзэж байгаа. УДШ С.Эрдэнийг АН-ын даргаар бүртгэхээс гурван удаа татгалзсан. Миний нэр УДШ-ийн цахим бүртгэлд байсан. С.Эрдэнэ салаа утгагүйгээр АН-ын дарга биш. 2017 оноос хойших бүртгэлд С.Эрдэнэ намын дарга байна гэдэг нь хууль бус шийдвэр, зохион байгуулалттай жүжиг. 

-Та нарыг хоол идсэн, архи дарс уусан гэсэн мэдээлэл гарсан? 

-Сүхбаатарын талбайд өлсгөлөн зарласнаас хойш бид нар нэг ч бохь амандаа хийгээгүй. Эрүүл мэндийн сайдын захирамжаар бид нар СБДЭМТ-д очиж, клизм тавиулсан. Нойтон өлсгөлөн зарлаж байгаа учир буцалсан уснаас өөр юм идээгүй 48 цаг болж байна. Биднийг харлуулах юм байна. Одоо чинь эмнэлэг хянадаг болчихсон цаг шүү. Б.Ганбат гишүүн эрүүл мэндийн байдлаас хамаарч өлсгөлөн биш, суултад оролцож байгаа. 

---