Их Британийн эрх баригчид 50-иас дээш насны бүх иргэндээ коронавирусийн эсрэг вакцины гурав дахь тунг тарихаар төлөвлөж байна. Гурав дахь тунг ирэх намар тарих бөгөөд Зул сарын баяр гэхэд цар тахлын халдварын аюулыг бүрэн арилгахыг зорьж байгаа аж.

Одоогийн байдлаар Их Британи даяар 34.6 сая гаруй хүнд коронавирусийн вакцины эхний тунг тариад байгаа бөгөөд 50-иас дээш насны хүмүүсийн 95 хувь нь хамрагдаад байгаа юм. 

Тэгвэл одоо мэргэжилтнүүд ирэх намрын саруудад эмзэг бүлгийн иргэдийг дархлаажуулах хамгийн үр дүнтэй арга замыг судалж байгаа аж. Ингэснээр өвлийн улиралд үүсэж болзошгүй халдварын дахин нэгэн давлагаанаас урьдчилсан сэргийлэх юм.

Английн эмнэлгийн ахлах мэргэжилтэн Крис Уиттигийг тэргүүтэй баг хоёр хувилбарын арга замыг үнэлэн, туршилт хийж байгаа гэнэ. Энэхүү нэмэлт арга хэмжээ нь вирусийн мутацид орсон шинэ хувилбаруудын аюулаас хамгаалах зорилготой аж.

Эрдэмтдийн санал болгож буй эхний шийдлийн дагуу мутацид орсон вирустэй тэмцэхийн тулд тусгайлан өөрчилсөн вакцинуудыг бүтээнэ. Харин хоёр дахь хувилбар нь аль хэдийн ашиглагдаж байгаа "Pfizer-BioNTech", "Oxford-AstraZeneca" эсвэл "Moderna" гэсэн гурван вакцины гурав дахь тунг тарих явдал юм.

Эрүүл мэндийн мэргэжилтнүүд коронавирусийн вакцины гурав дахь тунг улирлын томуугийн вакцинтай хамт тарихыг санал болгож байна.

Эх сурвалж: Independent

---