АНУ болон ОХУ-ын харилцаа холбоонд харилцан хүндлэл байхгүйн улмаас нөхцөл байдал "Хүйтэн дайн"-ы үеэс ч дор болсон гэж Оросын Гадаад хэргийн сайд Сергей Лавров хэлжээ.

Москвагийн талаас Вашингтонтой харилцаагаа хэвийн болгоход бэлэн байгаа хэдий ч АНУ холбоотнуудаа Орос, Хятадын эсрэг босгох гэж оролдохоо зогсоох хэрэгтэй гэж тэрээр мэдэгдсэн байна. Тэрээр "АНУ ашиг сонирхлын тэнцвэр дээр суурилсан, харилцан бие биеэ хүндэтгэх яриа хэлэлцээрээс зайлсхийвэл бид Хүйтэн дайны үеэс ч ч дор нөхцөлд амьдрах болно" хэмээн тэмдэглэжээ.

Лавров энэ талаар "Хүйтэн дайны үед хурцадмал байдал ширүүсэж, эрсдэлтэй хямралын нөхцөл байдал байнга гарч ирдэг байсан ч хоёр талаас харилцан хүндэтгэлтэй ханддаг байсан. Гэвч одоо энэ алдагдсан юм шиг санагдаж байна" хэмээн тайлбарласан юм.

Энэ сарын эхээр Жо Байдены Засгийн газар ОХУ-ыг 2020 онд болсон АНУ-ын Ерөнхийлөгчийн сонгуульд хөндлөнгөөс оролцож, нөлөөлсөн гэж буруутган, хориг арга хэмжээ авсан билээ. АНУ-ын эрх баригчид Оросын 10 дипломат ажилтныг албадан гаргаж, олон арван компани, хувь хүнийг онилон, ОХУ-ын мөнгө зээлэх чадварыг хязгаарласан юм.

Тэгвэл Оросын талаас мөн хариу цохилт хийж, АНУ-ын 10 дипломат ажилтныг улсаасаа хөөн, Америкийн одоогийн болон хуучин найман албан тушаалтныг хар жагсаалтад оруулж, тус улсын Элчин сайдын яамны үйл ажиллагаанд тавигдах шаардлагыг чангатгасан билээ.

Эх сурвалж: Associated Press

---