Польшийн нийслэл Варшав хотын Үндэсний музейн занданшуулсан шарил судлалын эрдэмтэд дэлхий дээрх цор ганц жирэмсэн эмэгтэйн занданшуулсан шарилыг олжээ.

Тус музейд 1826 онд ирсэн занданшуулсан шарилыг тайлгач эрэгтэйнх гэж итгэсээр ирсэн боловч уг шарил нь үнэн хэрэгтээ бие давхар эмэгтэйнх байжээ. Тайлгач гэж итгэж байсан шарилын рентген зургийг авахад эр хүний бэлэг эрхтэн байхгүй, эсрэгээрээ мөр давсан урт буржгар үстэй, 20-30 настай, долоо орчим сартай ураг тээсэн эмэгтэйнх болохыг тогтоожээ.

Дэлхий дээр занданшуулсан шарил элбэг боловч жирэмсэн эмэгтэйн шарил огт байдаггүй байна. Эмэгтэйн шарилыг занданшуулахдаа чухам яагаад ургийг их биеэс нь салгаагүйг эрдэмтэд ойлгоогүй ажээ. Судалгааны багийн гишүүн Войцех Эйсмонд дэлхий дээр байгаа цор ганц бие давхар эмэгтэйн занданшуулсан шарил гэдгийг онцлон, МЭӨ нэгдүгээр зуун, аль эсвэл түүнээс ч өмнө нас барсан байж болзошгүй гэж тайлбарласан байна. Польшийн эрдэмтэд эмэгтэйн нас барсан шалтгааныг тодруулахаар судалгаагаа үргэлжлүүлж байна.

Эх сурвалж: The Guardian

---