ДЭМБ-ын зүгээс Ази номхон далайн улс орнуудыг шинэ коронавирустэй холбоотой судалгаа хийхийг зөвлөж, санхүүжүүлсэн. Тиймээс манай улсын хувьд хүн амын насны бүлгүүдэд халдвар тархалт хэр зэрэг байгааг АШУҮИС-ийн Биоанагаахын сургуулийн тэнхимийн эрхлэгч Баттогтох ЭМЯ-ны хурлын үеэр таницууллаа. 

Тэрбээр "Найман аймаг хоёр хотын хэмжээнд 5000 хүнийг хамруулан, дагаж судалж байна. Одоогийн үр дүнгээр 30-39 насныхан түлхүү халдвар авсан байсан. Энэ судалгаа дуусаагүй. Судалгаанд хамрагдсан иргэдээ дагаж судалж байгаа. Шинж тэмдэг багатай халдвар авсан хүмүүс хөл хорио тогтоохоос өмнө маш бага хувиар хүн амын дунд байсан гэж таамаглаж байгаа.

Эмнэл зүйн шинж тэмдэг илрэхгүйгээр өвчилж байгаа иргэд насны бүлгүүдэд хэд байна вэ гэдгийг судалж байгаа. Өвчлөл нас баралтын хамаарал, эсрэг биеийн хэмжээг харьцуулан судалж байгаа.

Судалгаанд оролцогчдоос гурван сарын зайтай хоёр удаа ийлдэс/цус/ цуглуулаад, асуумж аваад явж байна. Одоогийн байдлаарх үр дүнгээс харвал,

• 2020 оны аравдугаар сарын 15-30-нд найман аймгийн 2,300 оршин суугчаас цуглуулсан цус болон нийслэлд дотоодын халдвар бүртгэгдсэнтэй зэрэгцээд цуглуулж эхэлсэн цус гээд нийт 5,000 хүний сорьцод шинжилгээ хийж үзэхэд маш бага хувьд нь буюу 1.2 хувьд КОВИД-19-ийн эсрэг бие үүссэн байсан. Эсрэг бие үүссэн хэсэг нь насны бүлэг болон орон нутагт ялгаагүй тархалттай харагдаж байгаа. 
• Дараагийн сорьцыг орон нутагт 2021 оны нэгдүгээр сарын 15-наас, Улаанбаатарт хоёрдугаар сарын 15-наас цуглуулж эхэлсэн. Ингээд шинжилж үзэхэд халдварын тохиолдол нэмэгдэж 1.4 орчим хувь болсон байсан. Хоёр дахь удаагаа цуглуулсан энэ сорьц дээрээс харвал, 30-39 насныхан түлхүү өвчилсөн байгаа. 

Дотоодын халдвар батлагдахаас өмнө цуглуулсан сорьцуудад маш бага хэмжээтэй эсрэг бие илэрч байгаа бөгөөд 2020 оны эрт үеийн эсвэл 2019 оны сүүл үеийн халдвар байхыг үгүйсгэхгүй" гэсэн юм. 

Хүний зохион бүтээгээд байгаа вирусийн эсрэг хамгаалах өвөрмөц арга нь вакцин юм. Тиймээс иргэд ухамсартайгаар хандаж, вакциндаа хамрагдаарай.

---