Өмнөд Солонгосын эрх баригчид коронавирусийн эсрэг вакцины хоёр тунгаа тариулсан иргэдийг ирэх 5 дугаар сарын 5-наас эхлэн 14 хоногийн тусгаарлалтаас чөлөөлнө гэж мэдэгджээ.

Эрүүл мэндийн байгууллагуудын мэдээлснээр вакцинаа бүрэн тариулсан иргэд халдвартай хүний ойрын хавьтал болсон ч өөрсдийгөө тусгаарлах шаардлагагүй болох аж. Түүнчлэн гадаадаас ирсэн иргэдийг ч мөн 14 хоногийн тусгаарлалтад орохыг шаардахгүй гэнэ. Гэсэн хэдий ч албаныхан ийм төрлийн хүмүүсийг 14 хоногийн турш хянах бөгөөд тухайн хугацаанд хоёр удаа шинжилгээ авна гэдгийг онцолсон байна.

Тус улсад одоогоор "Пфайзер", "АстраЗенека" зэрэг вакциныг ашиглаж байгаа бөгөөд эдгээр нь хоёр тунгаар бүрэн дархлаа тогтоох юм. Тусгаарлалтаас чөлөөлөх явдал нь хоёр дахь тунгаа тариулснаас хойш хоёр долоо хоног өнгөрсний дараа хэрэгжиж эхлэх аж.

Харин ОХУ-ын "Спутник V", БНХАУ-ын "Синофарм" гэх мэт Өмнөд Солонгост зөвшөөрөгдөөгүй вакциныг гадаадад тариулаад ирсэн хүмүүст энэхүү шинэ журам хамаарахгүй байна.

БНСУ одоогоор 52 сая хүн амынхаа таван хувь буюу 2.6 сая орчим хүнд коронавирусийн вакцины эхний тунг тариад байна.

Эх сурвалж: Yonhap News Agency

---