БНСУ-ын "Samsung" группийн Ерөнхийлөгч агсан И Кун Хигийн өв залгамжлагчид өв залгамжлалын татварт 12 их наяд вон буюу 10.7 тэрбум гаруй ам.долларыг төлөхөөр болсноо өнөөдөр мэдэгджээ. Энэ нь тус улсын түүхэн дэх хамгийн өндөр өв залгамжлалын татварын хэмжээ юм.

Өмнөд Солонгосын хамгийн баян хүн байсан И Кун Хи өнгөрсөн оны аравдугаар сард таалал төгсөж, 22 их наяд воны хөрөнгийг үлдээсэн бөгөөд үүнд 19 их наяд воны үнэлгээтэй хувьцаа багтаж байгаа аж. Хэрэв түүний үл хөдлөх хөрөнгийг оруулж үзвэл түүний нийт хөрөнгө 25 их наяд вон давж магадгүй юм. 

И Кун Хигийн өв залгамжлагчдаар түүний эхнэр Хонг Ра Хи, хүү И Жэ Ён болон И Бү Жин, И Со Хён гэх хоёр охин нь үлдсэн билээ.

Тэгвэл тэд өв залгамжлалын татвараа хэсэгчлэн төлнө гэж мэдэгдсэн байна. Тэд өвлөж авсан хөрөнгийнхөө зургааны нэгийг энэ сарын сүүлчээр төлөөд, үлдсэнийг нь ирэх таван жилийн хугацаанд төлөх боломжтой юм. Харин өв залгамжлагдсан хувьцаануудыг хэрхэн хувааж авах нь хараахан ил болоогүй байна.

"Samsung"-ийн гэр бүл мөн талийгаач И Кун Хигийн зарим хөрөнгийг хандивлан, нийгэмд буцааж өгнө хэмээн мэдэгджээ. Тэд коронавирусийн цар тахлын эсрэг тэмцэлд туслах зорилгоор 700 тэрбум вон хандивлах бөгөөд үүний 500 тэрбум нь Өмнөд Солонгосын анхны халдварт өвчний мэргэшсэн эмнэлгийг барихад зориулагдах аж. Мөн хорт хавдар болон ховор өвчнөөр шаналж буй хүүхдүүдийг дэмжихэд 300 тэрбум вон хандивлах гэнэ. Энэхүү хөрөнгө оруулалт нь ойрын 10 жилд 17 мянган насанд хүрээгүй өвчтөнд тусламж үзүүлэх юм.

Түүнчлэн И Кун Хи агсны хувийн цуглуулгын 23 мянга орчим урлагийн бүтээлийг хандивлахаар болжээ. Түүний цуглуулгад багтдаг үндэсний баялаг болон алдартай уран зургуудыг төрөл бүрийн музей, урлагийн төвд хандивлах бөгөөд эдгээр бүтээл нь 1-2 их наяд воноор үнэлэгдэж байгаа юм.

Эх сурвалж: Yonhap News Agency

---