Коммунист намын дарга Мао Зэдун БНХАУ байгуулагдсаныг зарлан тунхагласан 1949 оноос хойш тус улсын хүн ам анх удаа буурсан байна.

Дэлхийн хамгийн их хүн амтай Хятад улсын хүн амын тоо хамгийн сүүлийн тооллогын үр дүнгээр 1.4 тэрбум хүрээгүй аж. Энэхүү мэдээллийг тус улсын Засгийн газар энэ сарын эхээр зарлах ёстой байсан ч хойшлоод байгааг орон нутгийн хэвлэлүүд мэдээлж байгаа юм. Хятадын яамдууд 2018 оноос хойш 1.4 тэрбум гэх албан ёсны тоог ашиглаж ирсэн билээ.

Шинжээчдийн үзэж байгаагаар БНХАУ-ын хүн амын тоо буурч байгаа нь тус улсын эдийн засагт асар их сөрөг нөлөө үзүүлж магадгүй бөгөөд бусад улс орон Хятадыг харах өнцөг ч өөрчлөгдөх юм. Висконсин-Мэдисоны их сургуулийн ахлах эрдэмтэн Фуциан И "АНУ-ын эдийн засагчид болон албаны хүмүүс БНХАУ-ыг дэлхийг тэргүүлэх эдийн засагтай болж, Америктай өрсөлдөнө гэж үздэг. Гэвч үнэн хэрэгтээ Хятад улс тэдний бодож байгаа шиг хүчтэй биш юм" хэмээн тэмдэглэжээ.

Хятадад хүн ам зүйн хямрал нүүрлэх гэж буй шинж тэмдгүүд илт байсаар ирсэн бөгөөд албаныхны ашигладаг албан ёсны хүн амын тоо нь үргэлж үнэн байдаггүй гэж мэргэжилтнүүд үзэж байна. Үйлдвэрлэлийн салбар дахь ажиллах хүчний хомсдол болон Хятадын хүн амын огцом хөгшрөлт нь бараг 20 жилийн өмнөөс ажиглагдаж эхэлсэн аж. Тэгвэл тус улсын иргэд эрх баригчдыг "Нэг хүүхдийн бодлого"-ыг зөөлрүүлэх хүртлээ хэтэрхий удаан хүлээсэн гэж буруутгаж байгаа юм.

Эх сурвалж: South China Morning Post

---