ОХУ-ын Холбооны аюулгүй байдлын алба гадаадын иргэдэд хуурамч бичиг баримт үйлдэж өгдөг гэмт бүлэглэлийг баривчилж, таван нууц хэвлэх үйлдвэрийг илрүүлжээ.

Тус албаны мэдэгдэлд "Домодедово олон улсын нисэх онгоцны буудлын Холбооны аюулгүй байдлын албаны хилийн хяналтын бүлгийн ажилтнууд ОХУ-ын нутаг дэвсгэр дээрх гадаадын иргэдийг хууль ёсны болгох чиглэлээр үйл ажиллагаа явуулдаг зохион байгуулалттай гэмт бүлэглэлийн үйл ажиллагааг таслан зогсоосон. Мөн Москва бүсэд ажиллаж байсан таван хэвлэх үйлдвэрийг илрүүлсэн" гэж тэмдэглэсэн байна.

Албаныхан эдгээр хэвлэх үйлдвэрт нэгжлэг хийн, төрийн болон эрүүл мэндийн байгууллагуудын 50 гаруй тамга, тэмдэг, 2,500 гаруй хоосон паспорт, жолооны үнэмлэх, шилжилт хөдөлгөөний карт, хөдөлмөрийн үйл ажиллагааны зөвшөөрөл болон бусад бичиг баримтыг хураан авчээ.

Москва дахь Мөрдөн байцаах албаны хэвлэлийн төлөөлөгч Юлия Ивановагийн хэлснээр хууль сахиулах байгууллагын ажилтнууд нийт 11 ийм төрлийн газарт нэгжлэг хийсэн аж. Тэрээр "Энэ хэрэгт холбогдсон 16 хүнийг бүсийн хэлтэст хүргэн, шалгаж байгаа. Одоогоор тэдний тавыг нь саатуулж, яллагдагчаар татаад байна" хэмээн дурджээ.

Эх сурвалж: TASS

---