Европын Холбоо "АстраЗенека" коронавирусийн эсрэг вакцин үйлдвэрлэгчийг шүүхэд өгөн, хууль ёсны арга хэмжээ авч эхэлснээ мэдэгджээ.

Тус холбооноос "АстраЗенека" компанийг вакцин нийлүүлэх гэрээгээ зөрчин, цаг тухайд нь хүргэх ажлыг зохион байгуулах "найдвартай" төлөвлөгөө гаргаагүй гэж буруутгаж байгаа юм. Харин вакцин үйлдвэрлэгч компанийн зүгээс энэ алхмыг "ач холбогдолгүй" зүйл гэж мэдэгдэн, шүүх дээр өөрсдийгөө бат хамгаална гэдгээ онцолжээ.

Европын Холбооны зарим гишүүн орон "АстраЗенека" компанийг Их Британи улсад давуу эрх олгосон гэж үзэж байгаа хэдий ч компанийн талаас үүнийг эрс няцааж байгаа юм. Европын Комиссын төлөөлөгчийн мэдээлснээр шүүхэд гомдол гаргах үйл ажиллагааг өнгөрөгч баасан гарагт эхлүүлсэн бөгөөд 27 гишүүн улс бүгд дэмжиж байгаа аж.

Хоёр тал өнгөрсөн оны 8 дугаар сард гэрээ байгуулсан бөгөөд Европын Холбоо нь "АстраЗенека" вакцины 300 сая тунг урьдчилан захиалсан билээ. Гэвч энэ оны эхээр вакцины үйлдвэрлэлд бэрхшээл гарсан тул нийлүүлэлт нь буурсан байна. Гэрээний дагуу 2021 оны эхний улиралд нийлүүлэхээр төлөвлөсөн 80 сая тун вакцины ердөө 30 орчим сая тунг илгээгээд байгаа аж.

Европын Холбоо нь анх "АстраЗенека"-г дархлаажуулалтын арга хэмжээнийхээ гол вакцинаар ашиглахаар төлөвлөж байсан боловч одоо "Pfizer-BioNTech" вакцинд найдаж байгаа юм.

Эх сурвалж: BBC

---