АНУ-ын Засгийн газар ойрын саруудад АстраЗенека үйлдвэрийн коронавирусийн эсрэг вакцины 60 сая тунг дэлхийн бусад улс орнуудад хуваарилна гэдгээ мэдэгджээ. Хэдийгээр тус улсын холбогдох эрх мэдэлтнүүд тус вакцины хэрэглээг албан ёсоор хүлээн зөвшөөрөөгүй байгаа ч нөөц бүрдүүлж байна.

Бусад улс орнуудад вакцины хүртээмж хангалтгүй байхад Америкийн Засгийн газар их хэмжээний нөөц бүрдүүлж байгаад олон улсын зүгээс шүүмжлэлтэй хандаж байгаа юм. Мөн дэлхий нийтээрээ цар тахалтай тэмцэхэд Америкийн оруулж буй хувь нэмэр хангалтгүй байна гэх шүүмжлэлт өртөж байна.

Америкийн Хүнс, эм бэлдмэлийн газар ойрын хугацаанд АстраЗенека вакцинд зөвшөөрөл олгохоор ажиллаж байна. Өнгөрсөн сард Ерөнхийлөгч Жо Байден АстраЗенекагийн дөрвөн сая тун вакциныг Мексик, Канад улсуудад илгээхээ мэдэгдсэн билээ.

Эхний ээлжинд 10 сая тун, үргэлжлүүлээд 50 сая тун вакцин үйлдвэрлэлтийн шатанд явагдаж байгаа гэж Цагаан ордон мэдээлжээ. Цагаан ордны хэвлэлийн төлөөлөгч 60 сая тун вакциныг ямар улс орнуудад, хэрхэн зохион байгуулалттайгаар хуваарилах явцыг илүү тодорхой болгосны дараа дэлгэрэнгүй мэдээлнэ гэлээ.

Энэтхэг улсад ойрын хоногуудад коронавирусийн халдварын тархалт огцом нэмэгдэж, дэлхийн хамгийн хүнд бүс болоод байгаа. Даваа гарагт Ерөнхийлөгч Байден Энэтхэгийн Ерөнхий сайд Нарендра Модитой утсаар холбогдож, хүчилтөрөгчийн аппарат, вакцин үйлдвэрлэх материал, эм эмчилгээний эд зүйлс зэргийн яаралтай тусламж үзүүлэхээ амласан байна.

Эх сурвалж: ВВС

---