Итали даяар Робинзон Крузо хочоороо алдартай Муаро Моранди эзэнгүй арал дээр 32 жилийн турш орь ганцаараа амьдарсны эцэст арлыг орхихоор шийджээ. Орон нутгийн эрх баригчид түүнийг арлыг орхин явахыг удаа дараа шахаж шаардсаны эцэст Моранди бууж өгсөн байна.

Тэрээр энэ жил 81 настай бөгөөд 1989 оноос хойш Сардиниа арлын хойд талд байрлалтай Буделли арал дээр амьдарчээ. Үзэсгэлэнт ягаан өнгийн далайн эргээрээ алдартай уг арлын эзэмшигчид түүнийг нүүлгэн шилжүүлэхийг хүсэлтээ илэрхийлсээр ирсэн байна.

Моранди өөрийн Facebook хуудсандаа арлыг орхин явах болсноо хэлж “би арлыг 32 жилийн турш хамгаалсан шиг Буделлийг ирээдүйд хамгаална гэдэгт итгэж байгаа учраас явахаар шийдлээ” гэжээ. Робинзон Крузо үзэсгэлэнт арлаас нүүхээр болсон ч мөн л олон нийтийн хөлөөс дайжиж ганцаараа амьдарч болох газрыг хайсаар Полинесиагийн элсэн цөлтэй арал дээр очиж амьдрахаар болсон байна. Уг арал дээр нийгмээс ангид, байгальд ойр шинэ амьдралаа эхлүүлнэ гэжээ.

Хамгийн анх Моранди хэсэг нөхдийн хамт Ла Маддаленад ирж ажиллаж, мөнгө хуримтлуулан аяллын сан бүрдүүлэх зорилготой байсан боловч Буделли арал дээр ирж арлын хамгаалагчтай уулзсаныхаа дараа тэрээр эндээ үлдэхээр шийдсэн байна. Энэ цагаас хойш арлыг харж хандан, аялагч жуулчдад замчилдаг болжээ.

Морандигийн амьдардаг овоохой хууль бусад тооцогддог бөгөөд хэрэглэдэг радио станц нь дэлхийн хоёрдугаар дайны үеийнх байжээ. Өнгөрсөн жилүүдэд түүнийг арлаас олон удаа хөөсөөр ирсэн байна. Гэвч Италийн ард иргэд түүнийг үлдээхийг хүссэн 70,000 хүний гарын үсэгтэй хүсэлтийг Засгийн газарт өргөн барьж байжээ.

Эх сурвалж: ВВС

---