Чехийн Засгийн газар Прага дахь ОХУ-ын Элчин сайдын яамны 63 ажилтныг албадан гаргах шийдвэр гаргасан болохыг тус улсын Гадаад хэргийн сайд Якуб Кулханек мэдэгджээ.

Тэрээр "ОХУ-ын Элчин сайдын яамны 63 ажилтан Чех улсаас гэр бүлийн гишүүдийн хамт явах болно. ОХУ тэднийг ирэх 5 дугаар сарын сүүл гэхэд татан авсан байх ёстой" хэмээн тэмдэглэсэн байна. Түүний хэлснээр энэхүү арга хэмжээ нь Прага дахь Оросын Элчин сайдын яамны ажилтнуудын тоог Москва дахь Чехийн дипломат ажилтнуудын тоотой дүйцүүлж байгаа хэрэг аж.

Чех улсын Врбетице тосгонд байрлах зэвсгийн агуулахуудад 2014 онд гарсан дэлбэрэлтэд ОХУ-ын оролцоо байсан гэж Чехийн эрх баригчид үзэж байгаа юм. Харин Оросын Гадаад хэргийн яамнаас хоёр улсын хоорондох энэхүү асуудлыг яаралтай шийдвэрлэх арга хэмжээ авахаа илэрхийлээд байна.

Эх сурвалж: TASS

---