ЭМЯ-наас коронавирусийн халдварын нөхцөл байдлын талаарх 11:00 цагийн ээлжит мэдээллээ хүргэн, вакцинжуулалттай холбоотой иргэдийн асуултад тайлбар хийлээ.

АШУҮИС-ийн Нөхөн үржихүйн тэнхимийн эрхлэгч н.Мөнхцэцэг: "Коронавирусийн халдвар гарснаас хойш уг цар тахал жирэмслэлтэд яаж нөлөөлөх вэ, эмэгтэй нөхөн үржихүйн эрхтэн тогтолцоонд яаж нөлөөлөх вэ, ураг халдвартай төрөх үү, хөхөөр дамжих уу гээд маш олон эргэлзээтэй асуудлууд байгаа. Гэхдээ энэ вирусийн халдвар нь вакцин хийлгээгүй тохиолдолд жирэмсэн эмэгтэйчүүдэд хүндрэл үүсгэх өндөр эрсдэлтэй.

Мөн коронавирусийн халдвар нь ургийн хөгжилд гаж хөгжил үүсгэхгүй, үр тогтолтод нөлөөлөхгүй гэдэг нь судалгаагаар батлагдсан. Коронавирусийн вакцин ч мөн эх болон урагт нөлөөлөх хэмжээний амьд вакцин биш. Эрсдэлтэй жирэмсэн эхчүүд харин ч вакцин хийлгэх нь илүү их ач холбогдолтой. Түүнчлэн коронавирусийн вакцин нь үр тогтолт, нөхөн үржихүйд огт нөлөөлөхгүй. Харин ч цар тахлын үед жирэмслэхээр төлөвлөж байгаа хүмүүс аль болох вакциндаа хамрагдах хэрэгтэй.

ОХУ-ын "Спутник V" гэх мэт сулруулсан буюу өвчин үүсгэх чадваргүй болгосон вакцинуудыг жирэмсэн эхчүүдэд тарихгүй гэсэн заалт байгаа. Жирэмсэн эмэгтэйчүүд нь өвөрмөц бүлгийн хүмүүс учраас болгоомжтой хандаж байгаа явдал юм. Харин АНУ-ын "Moderna", "Pfizer" гэх мэт гений инженерчлэлээр гаргаж авсан вакцинууд нь хүний биед вирусийг огт оруулахгүй байгаа учраас ямар ч эрсдэл байхгүй гэж үзэж байгаа. Харин ч халдвар авах өндөр эрсдэлтэй жирэмсэн эхчүүдэд тарихыг зөвлөж байгаа юм.

Миний бодлоор аль ч төрлийн коронавирусийн эсрэг вакцин хийлгэсэн ураг, эхэд эрсдэлгүй. Мөн жирэмснийхээ эхний гурван сард мэдэлгүйгээр вакцин хийлгэсэн бол айх аюулгүй. Харин дараагийн тунгаа тариулах уу үгүй юу гэдгээ эмчтэйгээ сайн ярилцах хэрэгтэй.

Түүнчлэн коронавирусийн халдвар авсан эх ч гэсэн халдвар хамгааллын дэглэмээ маш сайн сахиад, хүүхдээ хөхүүлж болно. Вакцин хийлгэсний дараа ч мөн хүүхдээ хөхүүлэхэд аливаа асуудалгүй. Эхийн сүү нь эрсдэлээсээ илүү ач холбогдолтой бөгөөд хүүхдийг олон халдварт өвчнөөс хамгаална.

Иргэдийн дунд бас БНХАУ-ын вакцины талаар олон буруу ойлголт байх шиг байна. "Синофарм"-ын вакцин нь клиник туршилтын гурван шатны судалгаагаа бүрэн дуусгасан бөгөөд дэлхийн маш улс орон хэрэглэж байна. Мөн тус вакцин нь энэ 4 дүгээр сарын сүүлээр ДЭМБ-аас зөвшөөрөл авах төлөвтэй байгаа юм. Тиймээс Хятадын вакцины талаар эргэлзэх хэрэггүй гэж үзэж байна" гэв.

---