Тайландын хойд хэсэгт орших агуй дотор үерийн уснаас болж дөрвөн өдрийн турш гацсан Буддын шашны ламыг шумбагчид амжилттай авран хамгаалсан гэж орон нутгийн албан тушаалтан мэдээлжээ.

46 настай Пра Манас нь өнгөрсөн долоо хоногийн бямба гарагт Фитсанулок мужийн Там Фра Сай Нгам агуйд бясалгал хийхээр оржээ. Гэвч түүнийг бясалгаж байх үеэр их хэмжээний аадар бороо орсны улмаас агуй усаар дүүрч, гарц нь хаагдан, лам агуй доторх өндөр газарт гараад, гацсан байна.

Борооны дараа Пра Манас эргэж ирээгүйг анзаарсан тосгоныхон орон нутгийн удирдлагад дуудлага өгч, мэдэгдсэн байна. Ингээд түүний гацсан агуйн гадаа эмч, шумбагч, бусад мэргэжилтнүүд зэрэг олон зуун аврах ажилтнууд цугларчээ. Аврах багийн долоон шумбагч өнөөдөр буюу 4 дүгээр сарын 7-ны өглөө агуй руу орж, Пра Манасд шумбах маск зүүлгэн, усан доор 12 метрийн зайг туулан, аюулгүй газарт хүргэсэн байна.

Энэхүү явдал нь тус улсад 2018 онд гарсан ижил төстэй хэргийг санагдуулж байгаа юм. Тайландын нэгэн өсвөр үеийн хөлбөмбөгийн баг Чианг Рай мужийн агуй дотор хоёр долоо хоног гаруй хугацаанд гацсан билээ. Тэднийг аврахаар Тайландын тэнгисийн цэргийн алба хаагчид, олон улсын шумбах баг ба олон зуун хүн тусламж үзүүлэн ажиллаж, 12 хөвгүүн болон тэдний дасгалжуулагчийг амжилттай аварсан юм.

Эх сурвалж: Associated Press

---