Италийн зоогийн газрын эзэд болон бусад бизнес эрхлэгчид цар тахлын улмаас тэдний үйл ажиллагааг хэдэн долоо хоногийн турш зогсоосныг эсэргүүцэж, Ром хотын Парламентын ордны гадна цагдаа нартай мөргөлджээ.

Мөргөлдөөний үеэр нэг офицер гэмтсэн гэж "LaPresse" агентлаг мэдээлсэн юм. Албаныхан эсэргүүцлийн жагсаалд оролцсон долоон хүнийг саатуулсан байна.

Тус улсын Төлөөлөгчдийн танхимын гадаа цугларсан хэдэн зуун жагсагч амны хаалтаа тайлан, "Ажил!", "Эрх чөлөө!" хэмээн хашхирч байжээ. Тэд мөн утаат гранат болон бусад зүйлийг шидэж байсан аж.

Энэхүү мөргөлдөөн гарахаас хэдэн цагийн өмнө Италийн өмнөд хэсгийн Касерта хотын ойролцоо мөн томоохон эсэргүүцлийн жагсаал болж, хурдны замын хөдөлгөөнийг хаасан байна. Олон зуун жагсагчийн дунд гадаа зах дээр ажилладаг хүмүүс, фитнес төв болон зоогийн газрын эзэд байсан аж. Тус улсад фитнес төв, спорт заалнууд сүүлийн хэдэн сарын турш хаалттай байгаа юм.

Италид энэ сарыг дуустал зоогийн газар, баар, кафед сууж үйлчлүүлэхийг хориглоод байгаа бөгөөд энэ хязгаарлалт цаашид үргэлжлэх магадлалтай. Хоолны газрууд зөвхөн авч явах болон хүргэх үйлчилгээг зөвшөөрч байгаа юм.

Эх сурвалж: Associated Press

---