Их Британид чанга хатуу хөл хорио тавигдан, эдийн засаг нээгдэж байгаатай холбогдуулан Засгийн газрын дэмжлэгтэй зээлийн хөтөлбөрийг өнөөдрөөс эхлэн хэрэгжүүлэхээр болжээ. Энэхүү хөтөлбөрийн хүрээнд компаниуд хамгийн ихдээ 10 сая фунт стерлинг буюу 14 сая ам.долларын зээл авч, санхүүжилт олох боломжтой аж.

Манай улсад үүнтэй төстэй 10 их наяд төгрөгийн хөтөлбөр хэрэгжүүлж байгаа билээ. Монгол Улсад арилжааны банкны эх үүсвэрийг ашиглан, зээлийн хүү нь 3 хувь байгаа бол Их Британид төрөөс эх үүсвэрийг нь шийдэж, зээлийн хүү нь 14.99 хувь хүртэл байхаар тогтоожээ.

Их Британийн Сангийн сайд Риши Сунакын мэдээлснээр компаниуд 25,001-10 сая хүртэлх фунт стерлингийн зээл авах боломжтой бөгөөд уг төсөл нь одоо хэрэгжиж буй бусад "Ковид-19"-ийн хөтөлбөрийг орлох аж. Үүний хажуугаар компаниуд арилжаагаа дахин эхлүүлэхэд нь туслах зорилготой буцалтгүй тусламжийн хөтөлбөр хэрэгжүүлж байгаа юм.

Зээлийн хөтөлбөрийг Британийн бизнес банк удирдан зохион байгуулж, Засгийн газраас 80 хувийн баталгаа гаргах бөгөөд арилжааны зээлдүүлэгчдээр дамжуулан зээл авах боломжтой байна. Төсөл энэ оныг дуустал үргэлжлэх бөгөөд зээлийн хүүгийн дээд хязгаарыг 14.99 хувиар тогтоожээ.

Тус улсын Засгийн газраас ажлын байруудыг хамгаалахын тулд зээлийн хүүг бууруулахыг зээлдүүлэгчдээс хүсэж байгаа аж. Одоогоор Их Британийн яаралтай тусламжийн зээл нь 75 тэрбум гаруй фунт стерлингийн санхүүжилтийг дэмжээд байгаа гэж эрх баригчид мэдээлсэн юм.

Эх сурвалж: Reuters

---