Олны нэрлэж заншсанаар Хүүхдийн парк гэх цэцэрлэгт хүрээлэнг 1991 оноос “Монголын Үндэсний Соёл Амралтын Хүрээлэн” хэмээн нэрлэсэн ч үйл ажиллагаа нь доголдож, үе үеийн Нийслэлийн удирдлагын шийдвэрээр хувийн хэвшлийн аж ахуйн нэгжүүдэд газраас нь олгосоор ирсэн бөгөөд одоо Нийслэлийн төвд үлдсэн цор ганц ногоон байгууламж бүхий энэ газарт барилгажилтын ажил явагдах гэж байна гэх мэдээлэл гарах болсон. 

Иргэд үүнийг эсэргүүцэж байгаа бөгөөд цаашид уг асуудалд анхаарал хандуулан Паркаа ногоон орчин болгохыг хүсэж байна. Аливаа улсын нийслэлүүд хотын төвдөө иргэддээ тааламжтай орчин бүрдүүлсэн цэцэрлэгт хүрээлэнтэй байдаг. Гэтэл манай хот олон жилийн уламжлалтай байсан тохилог орчноо нураасаар өдий хүрлээ.

Иймд эцэг эхчүүд нэгдэн "Паркаа аваръя" хөдөлгөөн эхлүүлж иргэдийг санал өгөхийг уриалж байна.

Өнгөрсөн амралтын өдрүүдээр эцэг эхчүүд нэгдэн гарын үсэг цуглуулах ажиллагаа зохион байгуулсан юм. Энэ өдөрлөгийн үеэр 1200 гарын үсэг цугларчээ. Мөн онлайнаар гарын үсэг цуглуулах ажил үргэлжилж байна. 

Эцэг эхийн төлөөлөл: 

Биднийг бага байхад хүүхдийн парк гэдэг иргэдийн амарч зугаалдаг газар байсан шүү дээ. Буга ороод ирдэг. Хүүхдүүд тоглож гүйлдсэн. Хичнээн сайхан ногоон байгууламж байсан билээ дээ. Гэтэл жил бүр багасч, энд тэнд нь барилга баригдаад одоо бүр тохижуулна гэсэн нэрээр хотхон барина гэдэг чинь юу болж байгаа юм бэ? Бусад бүх хот төвдөө том цэцэрлэгт хүрээлэн, ногоон байгууламжтай байдаг. Манай хотод одоо ногоон байгууламж үнэхээр бага байна. Тиймээс байгаа ганц цэцэрлэгт хүрээлэнгээ аварч үлдэхийг эцэг эхчүүддээ, иргэддээ уриалж байна. 

Та саналаа өгөх бол https://www.facebook.com/groups/284108593272592/ группт нэгдээрэй. 

 

---