Хонконгийн оршин суугч Дэвид Аллардис хоёр долоо хоногийн өмнө коронавирусийн вакцины эхний тунгаа тариулаад, эцэст нь санаа амраад байжээ. Гэвч тэрээр өөрийн захиалсан Германы "BioNTech" вакцины оронд Хятадын "Sinovac" вакциныг тариулсан болохоо мэдээд цочролд орсон байна.

55 настай Аллардис цусны хорт хавдартай бөгөөд ямар вакцин хийлгэх талаар эмчтэйгээ удаан зөвлөлдсөний эцэст "BioNTech" вакциныг сонгосон аж. Гэвч тэрээр вакцин хийлгэх өдрөө буруу дархлаажуулалтын төв дээр очсон бөгөөд хяналт шалгалтын ажилтнууд хайхрамжгүй хандсаны улмаас буруу вакцин тариулж байгаагаа огт ухаараагүй байна. 

Аллардис өнгөрөгч 3 дугаар сарын 18-нд Квун Тонг дахь "Hiu Kwong Street" спортын төвд "BioNTech" вакцин тариулах цаг авсан хэдий ч тус төвөөс 3 км-ийн зайтай "Kowloon Bay" спортын төв рүү андуурч очсон бөгөөд энэхүү төвд зөвхөн "Sinovac" вакциныг тарьж байжээ. Гэвч тэрээр энэ алдаагаа ухаараагүй бөгөөд Хонконгийн Засгийн газраас түүнд вакцин тариулах товлосон цагтаа ирээгүй талаар мессеж явуулсны дараа л буруу вакцин тариулснаа мэдсэн байна.

Тэрээр энэ явдлын талаар "Би "Kowloon Bay" спортын төв дээр вакцин хийлгэх цаг авсан эсэхийг хэн ч шалгаагүй. Хэрэв тэд шалгасан бол би тус цэг дээр захиалга өгөөгүй гэдэг нь дорхноо тодорхой болох байсан. Албаныхан хүн нэг бүрийг нэг бүрчлэн шалгаагүй нь үнэхээр буруу үйлдэл юм шиг санагдаж байна. Зарим вакциныг тариулахад тохиромжгүй хүмүүс байгаа шүү дээ. Хэн ч надад "Та буруу газарт ирсэн байна" эсвэл "Та буруу вакцин хийлгэж байна" гэж хэлээгүй" хэмээн ярьжээ.

Дэвид Аллардис буруу төв дээр очсон нь өөрийнх нь буруу гэдгийг хүлээн зөвшөөрч байгаа хэдий ч түүнээс хойш бүх зүйлд вакцинжуулалтын төвийн ажилтнууд хариуцлага хүлээх ёстой гэж үзэж байгаа аж. Тэрээр "Би амьдралынхаа багахан хэсгийг буцааж авахын тулд вакцин хийлгэхийг маш их хүсэж байсан. Хэрэв би "Ковид-19"-ийн халдвар авах л юм бол амьд үлдэхгүй ... Би өнгөрсөн нэг жил гаруйн турш ийм айдастай амьдарсан" гэсэн юм.

Эх сурвалж: South China Morning Post

---