Эрүүл мэндийн яамнаас коронавирусийн халдварын нөхцөл байдлын талаар 11:00 цагийн ээлжит мэдээллээ хийлээ.

ЭМЯ-ны Хэвлэл мэдээлэл, олон нийттэй харилцах зөвлөх Б.Ууганбаяр: "Улаанбаатар хотын 50-иас дээш насны иргэдийг дархлаажуулалтад хамруулах ажил сүүлийн 10 гаруй хоногт эрчтэй үргэлжилж байна. Гэвч эдгээр иргэдийн идэвх санаачилга дутуу байна. Үүнээс болоод 18-49 насны иргэдийн вакцинжуулалт хоног хоногоор хойшилсоор байна. Иймээс ахмадууд маань үүнд анхаарч, илүү хариуцлагатай хандах зайлшгүй шаардлагатай бана.

Эрүүл мэндийн салбарынхан 50-иас дээш насны иргэдийг вакцинжуулах гэж бараг 20 хонолоо. Гэвч 250 орчим мянган хүнээс дөнгөж 100 гаруй мянган хүн нь хамрагдаад байгаа нь идэвх маш муу байна гэсэн үг. Ирэх долоо хоногийн эхээс эхлээд бусад насны бүлгийн иргэдийг вакцинжуулахын тулд ахмадууд маань богино хугацаанд илүү эрчтэй хамрагдах хэрэгтэй. Тэгэхээр, 50-иас дээш бүх насны иргэд өнөөдөр, маргааш яаралтай вакцинжуулалтад хамрагдах хэрэгтэй байна.

Төвийн зургаан дүүргийн гэр хорооллын алслагдсан хэсгүүдэд тусгай автобус үйлчилж, иргэдийг вакцинжуулалтын цэг рүү хүргэн, буцаад гэрт нь буулгаж байгаа. 

Өдөрт 620 тохиолдол гарлаа гэхэд 24 цагт энэ "Эерэг" гарсан хүн болгон дээр очиж амжихгүй байна. Хөл хорио тогтоогүйн улмаас замын хөдөлгөөн, түгжрэл их байгаа энэ нөхцөл байдалд тандалтын багууд өдөрт ихээхэн цаг хугацааг зам дээр өнгөрүүлж байна. Тиймээс иргэдийг хүлээцтэй хандаж, өөрийнхөө аюулгүй байдлыг ханган, гэр бүлийнхэндээ халдвар тараахгүй байх арга хэмжээг авахыг хүсэж байна" гэв.

---