ОХУ-аас "Спутник-V" вакцины нэг сая тунг манай улс худалдан авахаар болсон талаар өмнө нь Гадаад харилцааны сайд Б.Батцэцэг мэдээлж байсан бол өчигдөр албан ёсоор ОХУ-тай гэрээ байгуулсан байна.  

Энэ хүрээнд Шадар сайд С.Амарсайхан, ОХУ-ын Аж үйлдвэр, худалдааны нэгдүгээр орлогч сайд С.А.Цыб, Оросын шууд хөрөнгө оруулалтын сангийн Ерөнхий захирал К.А.Дмитриев нартай удаа дараа захидлаар харилцан, цахимаар ярилцсаны үр дүнд ОХУ-аас татан авах Спутник V вакцины худалдааны гэрээг байгуулжээ. 

Гэрээ ёсоор эхний ээлжийн вакцин дөрөвдүгээр сарын 10-ны дотор нийлүүлэгдэхээр болсон хэмээн Монгол Улсын Шадар сайдын хэвлэлийн албанаас мэдээллээ.

Өмнө нь Ерөнхий сайд Л.Оюун-Эрдэнэ "ОХУ-аас Спутник V вакцины 300,000 тунг нь хандиваар, нэг сая тунг арилжааны шугамаар авахаар ярилцаж байгаа" гэж мэдээллэж байсан юм. Энэ мэтээр Засгийн газраас коронавирусийн эсрэг вакцины нийлүүлэлтийг эрчимжүүлж ажиллаж байна.

Өнөөдөр БНХАУ-аас 300 мянган тун Verocell вакцин татаж авна, мөн энэ сарын 9-нд нэмж 900 мянган тун вакцин оруулж ирнэ гэж Сангийн сайд Б. Жавхлан өнөөдрийн УИХ-ын чуулганы хуралдаан дээр мэдээллээ.

Өнөөдрийн байдлаар манай улс 323 мянга 690 иргэнээ вакцинжуулаад байна.

Ташрамд дурдахад, манай улс коронавирусний эсрэг Оксфордын их сургуулийн "Асртазенека", ОХУ-ын "Спутник-V", БНХАУ-ын "Синофарм", АНУ-ын "Файзер" вакциныг эмийн бүртгэлдээ авсан. 

Монгол Улсын хэмжээнд энэ сарын 2-ны байдлаар 12240 иргэн, дархлаажуулалт эхэлснээс хойш нийт 323690 иргэнийг вакцинжуулалтад хамруулаад байна.

---