Цагдаа нар руу гал нээн, гранат шидсэн ОХУ-ын Мытищи хотын оршин суугч Владимир Барданов өөрийнхөө байшинг галдан шатааж, улмаар амиа алджээ.

"Интерфакс" агентлагийн мэдээлснээр тус улсын Холбооны аюулгүй байдлын алба болон Дотоод хэргийн яамны ажилтнууд өнгөрөгч мягмар гарагийн өглөө Бардановын гэрт нэгжлэг хийхээр очсон байна. Тэрээр хууль бус зэвсэг хадгалсан хэргээр шалгагдаж байсан бөгөөд цагдаа нар түүний гэрийг нэгжих шүүхийн зөвшөөрөөлтэй байсан аж. Гэвч Барданов албаныханд хаалгаа тайлж өгөөгүй бөгөөд удалгүй тэдэн рүү гал нээн, цонхоороо хоёр гранат шидсэн байна.

Хэдэн цагийн дараа Барданов байшингаа дотроос нь галдан шатаасан бөгөөд цонхоороо үргэлжлүүлэн буудсаар байжээ. Аюулгүй байдлын албаныхан байшин руу ойртох оролдлого хийх тутамд тэрээр тэдний зүг гранат шидэж байсан байна. Энэ үеэр нэгэн хууль сахиулагч шархдан, эмнэлэгт хүргэгдсэн аж.

Гал удалгүй Бардановын байрлаж байсан өрөөг хамарсан бөгөөд хэд хэдэн тас тас хийх чимээ гарсны дараа тэрээр буудахаа больсон байна. Албаныхан Бардановын ойролцоо байсан зэвсэг галын улмаас дэлбэрч, тэрээр амиа алдсан гэж үзэж байгаа юм.

61 настай Владимир Барданов тэтгэвэрт гарахаасаа өмнө хэд хэдэн хувийн хамгаалалтын компани эзэмшдэг байжээ.

Эх сурвалж: Интерфакс

---