Италийн цагдаа нарын хоёр жилийн турш эрэн сурвалжилж байсан "Ндрангета" мафийн гишүүн Франческо Пелле Португалийн коронавирусийн эмнэлэгт эмчлүүлж байгаад баригджээ.

Пелле нь 2006 оны Зул сарын баярын өдөр өөр нэгэн мафийн гишүүний эхнэр Мария Странжог хөнөөх ажиллагааг зохион байгуулсан хэрэгт буруутгагдсан юм. Италийн Дээд шүүхээс түүнд оноосон бүх насаар нь хорих ялыг хэвээр үлдээх шийдвэрийг 2019 онд гаргасан хэдий ч Пелле үүний өмнөхөн Милан хотоос сураггүй алга болсон байна.

Италийн Дотоод хэргийн сайд Лучана Ламоржесе Франческо Пеллег Италийн хамгийн аюултай оргодлуудын нэг гэж нэрлэсэн бөгөөд тус улсын хагас цэрэгжүүлсэн цагдаагийн бие бүрэлдэхүүн болон мафийн эсрэг прокурорууд удаан хугацааны турш түүний мөрөөр мөшгөсөн гэж мэдэгджээ. Италийн өдөр тутмын "Corriere della Sera" сонинд мэдээлснээр Пелле нь коронавирусийн цар тахлаар өвчлөн, Лиссабоны эмнэлэгт хэвтэн эмчлүүлж байжээ.

43 настай Пелле нь "Ндрангета" мафийн бүлэглэлийн гол гишүүдийн нэг юм. Мария Странжогийн аллага нь өрсөлдөгч бүлгүүдийн удаан хугацааны тэмцлийн нэг хэсэг байсан гэж мөрдөн байцаагчид таамагласан. Пелле 2006 онд нуруундаа буудуулж байсан бөгөөд үүнээс хэд хоногийн дараа өрсөлдөгчийнхөө эхнэрийг хөнөөн, өшөөгөө авсан гэж албаныхан үзэж байгаа юм.

Эх сурвалж: Sky News

---