Польшийн Дотоод хэргийн яам тус улсын Цагдаагийн газар, Хилийн цэрэг болон Гал түймэртэй тэмцэх албанд үүрэг гүйцэтгэдэг морь, нохдыг төрийн албан хаагчийн албан ёсны статустай болгож, тэтгэвэр олгох шинэ хууль тогтоомжийг боловсруулжээ.

Одоогоор тус улсын албаны морь, нохойнуудыг албанаас нь чөлөөлөх үед төрийн тэтгэмж дуусдаг бөгөөд тэднийг бусдад үрчлүүлдэг байна. Польшийн Дотоод хэргийн сайд Мариуш Камински энэхүү шинэ хуулийн төслийг "ёс суртахууны үүрэг" гэж тодорхойлсон юм. Тэрээр "Албаны амьтдын ачаар нэгээс илүү хүний ​​амь аврагдаж, нэгээс илүү аюултай гэмт хэрэгтэн баригдсан" гэж өнгөрөгч хоёрдугаар сард хэлж байжээ.

Шинэ хуулийн төслийн хүрээнд одоо албаны үүрэг гүйцэтгэж байгаа 1,200 орчим нохой болон 60 гаруй морь албанаас чөлөөлөгдөөд тэтгэврийн мөнгө авах юм. Албаныхны мэдээлснээр тус улсад жил бүр албаны амьтдын 10 орчим хувь нь тэтгэвэрт гардаг байна.

Тэтгэвэрт гарсан албаны ноход үе мөчний өвчин зэрэг олон төрлийн эрүүл мэндийн асуудалтай тулгардаг тул тэтгэвэр тэтгэмж нь эдгээр амьтдын их хэмжээний эмнэлгийн зардалд нэмэр болно гэж Варшавын цагдаагийн газрын үнэрч нохойн сургагч Павел Кучнио онцолсон юм. Харин морь сургагч Катарзина Куччинска "Эдгээр амьтад төрд зүтгэн, ажил үүргээ сайн гүйцэтгэсэн тул өндөр түвшний эрүүл мэндийн үйлчилгээ авч, зохих ёсоор тэтгэвэрт гарах эрхтэй. Морьдын хувьд тэд ногоон бэлчээртэй газарт очих ёстой" хэмээн ярьжээ.

Эх сурвалж: Associated Press

---