Умард Солонгосын удирдагч Ким Жон Уны дүү Ким Ё Жон өнөөдөр мэдэгдэл хийн, Өмнөд Солонгосын Ерөнхийлөгч Мүн Жэ Инийг "АНУ-ын өсгөсөн тоть" хэмээн нэрлэжээ.

БНАСАУ өнгөрсөн долоо хоногт хоёр удаа баллистик пуужин харван, туршилт хийсэн бөгөөд Ерөнхийлөгч Мүн Жэ Ин энэ явдлыг шүүмжилсэн билээ. Тэгвэл Ким Ё Жон Мүн Жэ Иний хэлсэн "логикгүй, ичгүүргүй" үгс нь АНУ-ын байр суурийг илэрхийлж байгаа хэмээн мэдэгдсэн байна. Тэрээр "Түүний ичгүүргүй байдалд бид гайхаж байгаагаа нуух аргагүй. Тэр бол Америкийн өсгөсөн тоть учир ийнхүү "магтуулж" байгаадаа харамсаад хэрэггүй байх" гэжээ. 

Үүний хариуд Сөүл дэх Үндэсний нэгдлийн яамнаас Ким Ё Жоны мэдэгдэлд "маш их харамсаж байгаагаа" илэрхийлэн, хоёр Солонгос "Ямар ч нөхцөлд ёс зүйн наад захын хэм хэмжээг сахих ёстой" хэмээн тэмдэглэсэн байна.

Өмнөд Солонгост Ким Ё Жон анх "Энхтайвны элч"-ийн дүр төрхтэй байсан бөгөөд 2018 оны эхээр Сөүлд айлчлан, Ерөнхийлөгч Мүн Жэ Инийг ахынхаа өмнөөс Пхеньянд зочлохыг урьж байсан билээ. Гэвч удалгүй хоёр Солонгосын харилцаа дахин хурцдаж эхэлсэн бөгөөд Ким Ё Жон Өмнөд Солонгосын эсрэг байр суурийг манлайлан, хурц үгээр дүүрэн мэдэгдлүүдийг хийх болсон.

АНУ, Өмнөд Солонгос болон дэлхийн бусад улсууд Умард Солонгосыг баллистик пуужин харван, туршилт хийснийг хурцаар шүүмжилж байгаа билээ. Харин Умард Солонгосын зүгээс тус улс нь АНУ-ын цэргийн заналхийлэлтэй тэмцэхийн тулд ийм төрлийн зэвсгийн туршилт хийх бүрэн эрхтэй гэж үзэж байгаа юм.

Эх сурвалж: Associated Press

---