Өнгөрсөн амралтын өдрүүдэд Баян-Өлгий, Говь-Алтай, Ховд, Увс аймгийн нутгаар цаг агаарын гамшигт үзэгдэл болж, нийт 13 цахилгаан дамжуулах агаарын тулгуур багана унасан. Үүнээс болж дөрвөн аймгийн 46 сум тоггүй болсон юм. Энэхүү гамшигт үзэгдлийн талаар өнөөдөр ОБЕГ-аас мэдээлэл хийлээ.

Улсын онцгой комиссын нарийн бичгийн дарга, хурандаа М.Энх-Амар: Маргааш гэхэд 46 сумыг цахилгаан эрчим хүчээр хангана

Өнөөдрийн байдлаар 46 сум тоггүй байгаа бөгөөд дөрвөн аймгийн онцгой чиг үүргийн байгууллагуудыг Дөргөнийн усан цахилгаан станцаас цахилгаанаар хангаж байгаа гэнэ.

Салхин шуурганы улмаас 254 гэр нурж, 200 гаруй хашаа эвдэрсэн бөгөөд орон гэргүй болсон айл өрхүүдийг эмнэлэг, дотуур байр, хамаатан саданд нь байрлуулжээ. Улсын онцгой комиссоос урьдчилсан байдлаар 1 тэрбум гаруй хөрөнгийг шийдэн цахилгаан дамжуулах тулгаар баганын засвар, үйлчилгээ болон орон гэргүй болсон айл өрхөд 168 гэр шинээр олгохоор болж, өнөөдөр орон нутаг руу хүргэхээр болов.

Цахилгааны дамжуулах тулгуур багануудыг босгох ажлыг хурдан шуурхай хийж байгаа бөгөөд маргааш гэхэд 46 сумдыг цахилгаан эрчим хүчээр хангана хэмээн Улсын онцгой комиссын нарийн бичгийн дарга, хурандаа М.Энх-Амар дурдсан юм. Тэрбээр “Унасан тулгуур багануудын хувьд 1995 онд баригдсан бөгөөд 30-40 метр секундийн хүчтэй салхинд нурсан. Ер нь бол дээрх салхинд ямар ч барилга, байгууламж нурах нь ойлгомжтой. Иймээс Улсын онцгой комиссоос цахилгаан дамжуулах агаарын тулгуур багануудын ашиглалтын хугацааг уртасгах боломжийг судлах, 30-40 метр секундийн салхинд унахгүй бүтээцтэй байх шаардлага тавихыг Эрчим хүчний сайдад даалгасан” хэмээв.

Цаашид орон даяарх цахилгаан дамжуулах тулгуур багануудыг шинээр сольж, бүх аймаг, сумдад дизель станц байршуулах хэрэгтэй байгааг ОБЕГ-аас мэдэгдсэн юм.

Мөн цаг уурын байгууллагаас арванхоёрдугаар сарын 1-нээс баруун аймгуудын нутгаар, 2-ны өдрөөс ихэнх нутгаар цас орж салхины хурд 18-24 метр хүрч шуурна хэмээн анхааруулав.

---