"Цайз" барилгын материалын захад барилгын зарим материалын үнэ жилийн өмнөхөөс 20-50 хувиар өссөн байна.

Тус худалдааны төвийн борлуулагч нарын зүгээс өнгөрсөн оны сүүлчээр барилгын материалын үнэ нэмэгдсэн. Өдөр өдрөөр үнэ нэмэгдэж байна. Бид нарын зүгээс үнэ нэмсэн зүйл байхгүй, нийлүүлэгч аж ахуйн нэгж нэмэгдэлтэй үнээр оруулж ирж байна хэмээн дурдав. 

Тухайлбал, өнгөрсөн онд зургаан метрийн урттай палк 70 мянган төгрөг байсан бол энэ жил 100 мянган төгрөг болжээ. Дөрвөн метрийн палк 65-70 мянган төгрөгөөр зарагдаж байлаа.

Нимгэн банз өмнө нь 2500-3000 төгрөгөөр зарагддаг байсан бол өнөөдрийн байдлаар 5000 төгрөг болжээ. Нийлүүлж байгаа компаниуд нь үнээ нэмж оруулж ирж байгаа учраас үнэ нэмэгдэхээс өөр арга байхгүй гэсэн юм.

Арматурын үнэ өнгөрсөн хоёрдугаар сарын сүүлчээр өдөр болгон нэмэгдэж, өнөөдрийн байдлаар нэг тонн арматур 2 сая 250 мянган төгрөгөөр борлуулж байна. БНХАУ-аас үнэтэй орж байгааг борлуулагч нар дурдаж байв. Урьд нь нэг тонн арматур 1 сая 700 мянган төгрөг байжээ. Харин цементийн үнэ тогтвортой байгааг худалдаачид дурдсан юм.

---