Улсын онцгой комиссийн ээлжит бус хуралдаан /2021-03-26/ дөнгөж сая өндөрлөлөө. Хуралдаанаас гарсан шийдвэрийг Шадар сайд, УОК-ийн дарга С.Амарсайхан танилцууллаа.

С.Амарсайхан "Нэгдүгээрт, Нийслэл хотоос хөдөө орон нутагт зорчих хөдөлгөөнийг 14 хоногийн хугацаанд бүрэн хориглолоо. 

Хоёрдугаарт, Гуравдугаар сарын 28-ны өдрийн өглөөний 6 цагаас дөрөвдүгээр сарын 11-ний өдрийн 6 цаг хүртэлх хугацаанд халдварын тархалт өндөр Өмнөговь, Дорноговь, Архангай, Баянхонгор, Дархан, Дорноговь, Завхан, Орхон, Төв, Хөвсгөл, Хэнтий, Өвөрхангай, Увс аймгуудыг "Улаан түвшин"-д шилжүүллээ.

Гуравдугаарт, Халдварын тоо буурахгүй цаашид өссөөр байвал дөрөвдүгээр сарын 5-аас эхлэн хатуу хөл хорио тогтооно. Энэ хугацаанд вирусийн тархалтыг бууруулахын тулд хатуу шаарддага тавина. Олон нийтийн газруудад ариутгал халдваргүйтлийн ажлыг эрчимжүүлнэ. Энэ хугацаанд вакцинжуулалтын ажлыг эрчимтэй явуулж, тавдугаар сарын 1 гэхэд нийслэлийн нийт иргэдийг вакцинжуулж дуусгахаар төлөвлөлөө" гэлээ.

-Хөдөө орон нутгаас зайлшгүй шалтгаанаар ирсэн иргэдийг ч хот руу нэвтрүүлэхгүй юу?

-УОК-ын дарга С.Амарсайхан: Томилолтоор явах болон янз бүрийн шалтгаанаар хөдөө орон нутаг руу зорчих бүхий л хөдөлгөөнийг бүрэн хорьж байна. Нийслэл хотоос гарч буй хүнс, шатахуун, тэжээл, уул уурхайн бараа бүтээгдэхүүн, тариалалтын ажил зэрэг нэн шаардлагатай ачаа тээврээс бусад хөдөлгөөнийг хориглолоо.

-Эрүүл мэндийн сайд С.Энхболд: Зайлшгүй шалтгаанаар /эрүүл мэндийн/ хөдөө орон нутгаас нийслэлд ирсэн иргэнийг саадгүй оруулна. 

---