Америкийн Пфайзер компани коронавирусийн эсрэг вакцины туршилтаа хагас ойтойгоос 11 хүртэл насны хүүхдүүдэд туршиж эхэлсэн байна. Германы БиоНТек компанитай хамтран хөгжүүлсэн коронавирусийн эсрэг вакциныг хүүхдүүд дээр турших нэгдүгээр ээлжийн туршилтад 144 хүүхэд оролцох ажээ. Уг туршилтын зорилго нь аль насны хүүхдэд ямар хэмжээний тун хийх шаардлагатай болохыг тогтоох гэж эх сурвалжид мэдээлсэн байна.

Пфайзер компанийн зүгээс 2021 оны хоёрдугаар хагас гэхэд уг туршилтын үр дүн гарна гэж найдаж байна. Хэрэв туршилт амжилттай болбол 2022 оноос эхлэн 12-оос доош насны хүүхдүүдийг вакцинжуулах ажээ. Туршилтад орж байгаа хүүхдүүдэд нэг тунд 10 болон 20, 30 микрограм вакцины гурван өөр тунг тарих юм байна. Нийт 4,500 хүүхдийг туршилтад хамруулах ба хүүхдүүдийн дархлааны систем вакцинд хэрхэн хариу урвал өгч байгааг ажиглана.

АНУ-ын Модерна компани энэ сарын эхэнд хагас ойтойгоос 11 настай хүүхдүүдэд  Ковид-19-ийн вакцины туршилтаа эхлүүлсэн. Мөн Johnson & Johnson компани бага насны хүүхдүүд болон нярай хүүхдүүдэд вакцинаа туршихаар төлөвлөсөн гэдгээ мэдэгдээд байна.

Эх сурвалж: Live Science

---