Агуу зураач Винсент Ван Гогийн "Монмартрын гудамжны дүр зураг" хэмээх ховор бүтээл өнгөрөгч пүрэв гарагт Францын Парис хотноо болсон дуудлага худалдаагаар 13.1 сая евро буюу 15.4 сая ам.доллароор зарагджээ.

Нидерландын импрессионист мастерын тус бүтээл нь одоог хүртэл хувийн эзэмшилд байдаг түүний цөөхөн зургуудын нэг тул энэхүү дуудлага худалдаа маш их хүлээлттэй байсан юм. "Sotheby’s" дуудлага худалдааны байгууллагаас тус зураг 5-8 сая еврогоор зарагдана гэж таамаглаж байсан аж.

Дуудлага худалдааг зохион байгуулагчдын хэлснээр уг бүтээл 100 гаруй жилийн турш нэг гэр бүлийн цуглуулгад хадгалагдсан бөгөөд олон нийтийн нүднээс хол байжээ.

Энэхүү бүтээлд "Чинжүүн тээрэм" хэмээх салхин тээрмийг дүрсэлсэн бөгөөд эргэн тойрныг хүрээлсэн модон хашааны урд эрэгтэй, эмэгтэй хоёр болон бяцхан охин алхаж байгаа нь харагдана. Ван Гог 1886 онд Парис рүү нүүн, Монмартр дахь дүү Теогийндоо амьдрах болсон бөгөөд энэ зургийг нэг жилийн дараа зуржээ. Тэрээр 1888 онд Францын нийслэлийг орхин, өмнөд Франц руу явсан бөгөөд 1890 онд нас барах хүртлээ тэндээ амьдарчээ.

Эх сурвалж: Associated Press

---