ОХУ-ын "Роскомнадзор" буюу Харилцаа холбоо, мэдээллийн технологи, олон нийтийн хэвлэл мэдээллийн хэрэг эрхлэх газраас олон нийтийн сүлжээ, мессенжерт бүртгүүлж буй шинэ хэрэглэгчид паспортын дугаар, оршин суугаа хаяг, утасны дугаар, имэйл хаяг зэргээ заавал бүртгүүлэх ёстой гэсэн шаардлагыг бэлтгэн гаргажээ.

Энэхүү төслийг "Хувийн мэдээллийн тухай" хуульд нэмэлт, өөрчлөлт оруулсны хүрээнд боловсруулжээ. Албаныхан тус баримт бичгийг ОХУ-ын иргэд болон шинжээчдээр хэлэлцүүлэхээр энэ сарын 23-ны өдөр "Regulation.gov.ru" портал дээр байрлуулсан байна. Уг шаардлага нь эхний ээлжид олон нийтийн сүлжээ, мессенжерт чиглэгдэж байгаа бол вэбсайтууд хэрэглэгчдээс зөвшөөрөл авах өөрсдийн платформыг боловсруулах эсвэл төрийн үйлчилгээтэй холбогдсон "Нэгдсэн мэдээллийн систем"-ийг ашиглах гэсэн сонголттой байх аж.

"Нэгдсэн мэдээллийн систем"-д мөн аж ахуй нэгжүүд татвар төлөгчийн дугаар, улсын бүртгэлийн дугаар болон бусад мэдээллээ оруулаад бүртгүүлэх боломжтой байна. Түүнчлэн системд бүртгэгдсэн бүх хэрэглэгчдийн мэдээллийг "Холбооны хуулийн дагуу шаардлагатай гэж тогтоосон тохиолдолд Засгийн газрын бусад байгууллагуудад өгөх боломжтой" гэж албаны баримт бичигт дурджээ.

Гэхдээ хэрэглэгчид хувийн мэдээлэл цуглуулах талаар зөвшөөрлөө ямар системээр дамжуулан өгөхөө өөрсдөө шийдэх бөгөөд хэрэв "Нэгдсэн мэдээллийн систем"-ийг сонгосон тохиолдолд овог нэр, паспортын дэлгэрэнгүй мэдээлэл, оршин суугаа хаяг, утасны дугаар, имэйлээ бүртгүүлэх шаардлагатай аж.

Эх сурвалж: Znak

---